Zurich, Jylliew:
Katkum ka khubor ba lah ioh lum ka iathuh ba ka ri United States kan jam mynta shakhmat na ka bynta ka jingshimbynta ha ka lympung ialehkai World Cup jong ka jing-ialehkai phutbol ki kynthei ha u bnai ban wan, ha kaba ka kynhun ialehkai na katei ka ri kaba haduh mynta kam shym la don kano kano ka jingkylla. Kane ka kynhun ka lah nang iai bteng ban bat biang sa shisien ia ka kyrdan ba nyngkong ha ka thup ba san jong ka thup kyrdan ba thymmai ka FIFA.
Shuh shuh ruh ka khubor ka iathuh ba katei ka kynhun ialehkai na USA kaba lah bat ia ka kyrdan ba 1 ha ka thup jong ka FIFA naduh u Jylliew 2017, mynta ka iai bteng biang sa shisien na ka bynta ban shong ha katei kajuh ka kyrdan da kaba tam noh shakhmat ia ka Germany, Sweden, England bad France. Kumta ruh, ka kynhun ialehkai jong ki kynthei na Spain bad Brazil ki shah pynshong mynta ha ka kyrdan bad ba 8 da ka jingiakylliang jaka bad ka Canada kaba shah pynshong mynta ha ka kyrdan ba 7 bad kumjuh ruh bad ka Netherlands kaba shong mynta ha ka kyrdan ba 9 kaba long tang kitei ki jingkylla ha ka thup ba 20 jong katei ka thup kyrdan ba thymmai mynta.
Hadien ba lah dep ka jngialehkai paralok ha u bnai Iaiong mynta u snem, ka Spain ka lah pyniarygkat mynta ialade ha kaba iadei bad ka kyrdan ba biang tam eh ba ka ioh ban shong hadien ba katei ka kynhun ka la lah ban kamai bun kol ha ka jingialehkai bad ka Norway bad China kaba lah khur ia ka jingjop. Katba ka lahduh Copa America Femenina ka Brazil ka lah kamai ia ka jingjop bakhraw halor ka Germany.
Kumta ruh ka ri Australia & New Zealand kiba long ki ri ki ban pynlong ia katei ka lympung jong ki kynthei, ki ioh ban shong mynta ha ka kyrdan ba 10 bad 26 bad ka Zambia kan long ka kynhun ialehkai kaba shong shapoh eh ha ka thup kyrdan jong ki kynhun kata ha ka jaka ba 77. Ka khubor ka iathuh ruh ba ka tei ka lympung ialehkai World Cup jong ki kynthei kan sdang ban tyllun ka shalyntem jong ka naduh ka 20 tarik u Naitung haduh ka 20 tarik u Nailar 2023.
