Shillong, Jylliew 09:
Wat la ka jingïalehkai phutbol ka long kaba itynnad ha ka pyrthei hi baroh kawei, hynrei ïa kane ka jingïalehkai la pynjakhlia noh da katto katne ki ’riew shim kabu bad kane ka la jia ha Brazil.
Ka Ïingbishar jong ka Brazil ka la ai jingsneng da kaba pynduh ïalehkai haduh bun snem ïa ki rangïalehkai kiba don kti ha ka ban pynïaid lypa ïa ka jingïalehkai (match-fixing) bad kiwei ki kam kiba long pyrshah, kynthup ïa u rangïalehkai barim ka Mumbai City FC u Ygor Catatau.
U Catatau u la pynïasoh sha ka Mumbai City da kaba shim wai na ka Madureira na ka bynta ban ïashim bynta ha ka Indian Super League jong ka aïom ïalehkai 2021-22.
Na ka liang ka Superior Court of Sports Justice (STJD) ka la ai jingsneng ïa shi kynhun ki rangïalehkai phutbol kiba la ïadon bynta ha ka jingpynbeit lypa ïa ka jingïalehkai.
Ka Ïingbishar ka la ai jingsneng haduh 13 ngut ki rangïalehkai halor ka jingdon kti ha katei ka kam kaba long pyrshah. Lai ngut ki rangïalehkai ki la shah sospon shirta jingim na ka kam ïalehkai, katba hynriew ngut ki la shah sospon ka ban neh haduh 1000 sngi.
Hynrei tang ar ngut na ki, kiba la lait na ka jingshah pynshitom bad ki dang lah ban buh ka jingkyrpad bad ki dang lah ruh ban ïalehkai shabar ri tad haduh ba ka Ïingbishar kan shim ïa ka rai kaba khatduh. Bad na ka bynta u Ygor Catatau, ka Iingbishar ka la pynshitom ïa u da kaba pynduh ïalehkai shirta jingim.
Shuh shuh katei ka Ïingbishar ka la daiñ kuna ruh haduh $14,000 ïa utei u rangïalehkai. Utei u rangïalehkai na Brazil u la shah kynnoh ba u la don kti ha ka jingïathong lem bad saw ngut ki para nongïalehkai na ka Sampaio Correa ïa kaba ki la ïalehkai ha ka aïom ba la lah. Kitei ki rangïalehkai ki la shah pynbor ban sangeh ïalehkai ha ka jingïakhun jong ka second-division league.
Utei u rangïalehkai ba dang 27 snem ka rta u la wan sha India na ka bynta ban ïadon bynta bad ka Mumbai City FC kaba la khur ïa ka nam lahduh ha ka ISL. U la ïoh ban theo ia ka kol kaba nyngkong na ka bynta ban pynliem da 3-0 kol pyrshah ïa ka FC Goa.
