Shillong, Jylliew 09:
Ka Inter Milan kan pynkhreh ïa ka jingïakhun final ha ka Champions League ha ka sien kaba san ha kaba kan ïakynduh pyrshah ïa ka lahduh jong ka Premier League bad FA Cup ka Manchester City ha ka miet jong ka sngi saitjaiñ ha Istanbul.
Kane ka kynhun kaba la bat lai sien ïa ka nam lahduh kan pynkhreh ban khur biang ïa ka jingjop kaba nyngkong hadien ba kam shym la lah ban pynurlong ha ka Serie A, ka Italian Cup bad ka Champions League hapoh ka jingïalam u Jose Mourinho ha u 2010.
Na ka bynta u coach ba mynta u Simone Inzaghi, ka dang dei ka sien kaba nyngkong eh ban ïoh rung sha ka final ha ka Champions League.
Katto katne ki la khmih lyngba ka Inter Milan ka la lah ban wanphai sha ka thong jong ka jingjop naduh ba la pynïakap ïa ki kynhun ha u Nailar.
Hynrei ka Inter Milan ka la shah pynngat ha ka group kaba kham jwat kaba kynthup ïa ki kynhun ba khlaiñ bor ha Europe kum ka Bayern Munich bad ka Barcelona. Ka la lah ban pynliem ïa ka Porto, Benfica bad ka AC Milan ha shwa ba kan jam sha ka final.
Ha ka pre-quarter final, ka Inter Milan ka la lah ban pynliem ïa ka Porto na ka bynta ban tam da 1-0 kol lyngba ka aggregate bad ban jam sha ka quarter final ha ka sngi kaba nyngkong eh naduh ba ka la rah ïa ka nam lahdu ha u 2011.
Kumjuh ha ka Quarter final ka Inter Milan ka la lah ban pynliem ruh ïa ka Benfica da 2-0 kol bad ha ka wat kaba ar ka la ïakhaid mar 3-3 kol na ka bynta ban tam da 5-3 lyngba ka aggregate.
Ha ka semi final ka Inter Milan ka la lah ban pynliem sa ïa ka AC Milan da 2-1 kol ha ka wat ba nyngkong bad 1-0 kol ha ka wat ba ar. Kumta kane ka kynhun ka la khmih lynti ban ïalehkai bha ha katei ka jingïakhun final pyrshah ïa ka Man City.
