Paris, Jylliew:
Ka nongialehkai Tennis na Poland kaba dang iai bat haduh mynta kum ka lahduh ha ka pyrthei ka Iga Swiatek ka lah hap ban mad ia ka jingiakhun kaba eh bad jwat pyrshah ia ka Beatriz Haddad Maia ha ka lympung ialehkai ba mynta jong ka French Open. Katei ka nong-ialehkai ba pawnam ha ka pyrthei ka lah hap ban iakhun da kaba tyngeh shuh shuh tad haduh ba kan da lah ban pynliem noh ia katei ka nongiakhun pyrshah na Brazil da 6-2 7-6(7). Lyngba kane ka jingjop katei ka nong-ialehkai ka la jam mynta sha ka phainal ha ka sien balai ha ki saw snem jong ka jing-ioh shim bynta ha katei ka lympung.
Ka Iga hadien katei ka jingjop kan iakhun pyrshah bad ka Karolina Muchova ka ban long ha ka sngi saitjain; kaba la lah ban iada halade ia kawei ka dor-thong ialehkai ha shuwa ba kan lah pynliem noh ia ka Aryna Sabalenka da 7-6(5) 6-7(5) 7-5 kum ka jingpynkut noh shi syndon ia ki jingkhmih lynti jong katei ka nongialehkai na Belarus na ka bynta ba kan long ka lahduh ha ka pyrthei. Shuh shuh ruh ka Swiatek kaba lah khur ia ka nam jop ha ka Suzanne Lenglen Cup ha u snem ba lah dep bad ha u 2020, ha katei ka jingiakhun ka lah hap ban iakhun tyngeh bha khamtam ha ka jingiakhun tiebreak na ka bynta ban ioh pynjem noh ia ki khnap ialehkai ba tbit jong ka nongiakhun pyrshah.
Kumjuh ruh, ka Sabalenka ka lah dei ban khur shalade ia ka kyrdan ba hajrong lada ka lah ban khur ia ka nam lahduh ha katei ka lympung ialehkai ba mynta ha Paris, hynrei katei ka nongialehkai kaba long ruh ka lahduh Australian Open ka lah pynlehnohei ia ka kabu ksiar ba ka lah ioh ha ka 5-2 jingjop ha ka set iakhun kaba lai pyrshah ia ka Muchova bad kaba lah hap ruh ban mad noh ia ka jingpynkut ka jingiaid lynti jong ka ha ka lympung hadien ka jingshah rem ha ki san jingialehkai ba khatduh jong ka jingiakhun.
Ha kawei pat ka jingialehkai, ka khubor ka iatguh ba ka nongialehkai na Japan ka Miyu Kato ha ka jingiatreilang mynta bad u nongialehkai na Germany u Tim Puetz na ka bynta ban khur ia ka khet jingjop na ka kyrdan ialehkai ba mar shijur, kitei ki nongialehkai ki lah pynher sted shakhmat ia ka jingiakhun ka jong ki na ka bynta ban lah pynliem noh ia kiwei pat ki shijur iakhun pyrshah kata ka Bianca Andreescu na Canada bad u nongialehkai na New Zealand u Michael Venus da 4-6 6-4 (10-6) ha ka jingiakhun phainal ka jong ki. Ka Kato bad kawei pat ka nongialehkai na Indonesia ka Aldila Sutjiadi ha ka jingiatreilang ka jong ki, ki lah shah beh noh na ka lympung iakhun ha ka kylla iakhun kaba lai ha ka por ba ka Kato ka lah tied bad khyrwit tyngeh ia ka bol ialehkai ha ka madan ialehkai hapdeng ki dor-thong jong ki nongialehkai bad ka lah leit dei ruh kawei ka khynnah tam bol ha ka jingialehkai.
