Jowai, Jylliew 09:
Ka Ïooksi Youth Welfare bad ka Moodymmai ki la khur ïa ka jingjop ha kaba sdang ïa ka lympung ïalehkai Third Division Football Tournament kaba tip kum ka “3rd U Adelbert Laloo Memorial Trophy” ba la pynïaid da ka West Jaiñtia District Sports Association (WJDSA) ha ka sngi Thohdieng ha Kiang Nangbah Stadium, Ladthadlaboh.
Ha kane ka sngi sdang, ka Ïooksi Youth Welfare ka la pynjem khnap ïa ka Saiñdur Mihmyntdu da 6-1 kol. Ha kane ka jingïalehkai u Pyrkhat Pasleiñ u la ïoh ban thep ar kol ha ka minit kaba 3 bad 42, lem bad u Pyrshang Tangliang (9 & 27), katba u Ngaitmi Syngkon (70) bad u Sunny Son Sutnga (69) ki la thep mar shi kol. Na ka liang ka Saiñdur Mihmyntdu ka la lah ban pynphai kylla shi kol lyngba u Chibor Phawa ha ka minit kaba 41.
Kumjuh ha kawei pat jingïakhun, ka Moodymmai ka la pynliem noh ïa ka Mookynphad Mihmyntdu lyngba ka shi kol ba la thep da u Same Syngkon ha ka minit kaba 61.
Ha ka jingïalehkai kaba la long kham ha shwa hapdeng ka Lumsliar bad ka Lad Mukhla ki la ïasam mar shi point hadien ba ïakhaid mar 1-1 kol.
Ïa ka kol jong ka Lumsliar sliar la thep da u David Dkhar ha ka minit kaba 8, katba ïa ka kol jong ka Risingsun Mukhla la thep da u Yoshar O. Mukhim ha ka minit kaba 24.
