Shillong, Jylliew 09:
Ha kawei na ki jingïoh kurup drok kaba heh hapoh ka jylla, ka Directorate of Revenue Intelligence (DRI) jong ka Sorkar Pdeng, ha ka 8 tarik Jylliew, 2023 ka la ïoh ban kurup 3.99 kilo u drok Heroin na kawei ka kali ha Mawryngkneng, East Khasi Hills.
Ha kane ka jingïoh kurup drok la kem ruh ïa uwei u briew bad la pynngat ïa u ha ki kyndon jong ka NDPS Act.
Ha u kyrwoh khubor ba la phah da ka DRI ha ka Sngi Thohdieng, la ïathuh ba ki heh jong ka DRI Shillong ki la pynsangeh ïa kawei ka kali SUV ba la suba ba la don u nongkhaïi drok bad ïa kane ka kali la pynsangeh ha Mawryngkneng.
Ha ka jingkhynra ïa kane ka kali la lap 307 tylli ki synduk sabon bad ha kine ki synduk la thep ïa u ‘powder’ uba ka jingkhia u long 3.99 kilo. Ïa kine ki synduk sabon la buhrieh ha kawei ka jaka kaba don ha khrum ka jaka shong lane ‘seat’ jong kane ka kali.
Ka DRI ka la ong ruh ba ka jingtohkit ka pynpaw ba ïa utei u drok Heroin la wan kit na Manipur lyngba ka Mizoram. La ong ruh ba ka dor ha ïew ha hat jong utei u drok u long T. 27.94 klur bad ka jingtohkit ka dang ïaid shakhmat.
Shuh shuh la ong ruh ba ha u snem 2022-2023, ka DRI Shillong ka la ïoh ban kurup palat 6.25 kilo u drok Heroin ba shongdor T. 43 klur.
