Guwahati, Jylliew:
Ki bor ba halor jong ka tnat Northeast Frontier Railway (NFR) ha kane ka taiew kaba mynta ki la pyntip ba ka NFR ka la shim ïa ki sienjam kiba kyrpang na ka bynta ban pynsuk ïa ka leit ka wan jong ki rel – ban lait na kino kino ki jingthut kiba lah ban wan jia ha ka leit ka wan jong ki paidbah.
Kat kum ka kyrwoh ba la pyllait da ka NFR, la pyntip ba na ka liang ki nongtrei jong ka, ha ki khyndiat taiew bad bnai kiba la leit noh ki la pynlong ïa ki jingleit khmih bad jurip bniah ïa ki lad treikam jong ki rel bapher bapher kiba hap hapoh ka jingkhmih jong ka NFR. La pynlong ïa kitei ki jingleit jurip ban lap ïa ki jingdkoh ha ki lad trei kam jong ki rel – ban pynbha bad kyntiew ïa ki lad trei kam jong ki.
Ha ki jingleit jurip, la ïathuh ba ki nongtrei ka NFR ki la khmih bniah halor ki lad trei kam jong ki rel bapher bapher khnang ba yn lah tehlakam bad ïada na kino kino ki jingjia kiba lah ban wanrah ïa ka jingsngewsih. La khmih bad jurip bniah ruh ïa ki nongtrei jong ki rel – ba kin shimkhia ïa la ki jong ki kamram na ka bynta ka suk ka saiñ jong ki nongleit nongwan.
Shuh shuh ha katei ka jingleit jurip jong ki nongtrei ka NFR, la khmih bniah ruh ïa ki kor trei kam kiba la kham rim na ka bynta ban pynbujli da ki kor trei kam kiba thymmai kiba dei kat kum ka teknoloji jong kane ka por kaba mynta. La khmih bniah ruh ïa ki lynti ïaid rel, ki ‘rolling stock’, ki kor ai ‘signal’, ki ‘interlocking system’, bad kiwei kiwei.
Ki kor treikam kiba la pyndonkam na ka bynta ban lah kiar na ki jingjia kiba sngewsih ki kynthup ïa ki ‘electronic interlocking’, ‘track circuiting’, Block Proving Axle Counters (BPAC), ‘Colour Light LED Signals’, ‘Train Protection Warning Systems’ (TPWS), ‘Mobile Train Radio Communication’ (MTRC), ‘Dedicated OFC based Acoustic Sensing Systems’, ‘Vigilance Control Device’ (VCD), ‘Fog Pass Device’, ‘Pre-stressed Concrete Sleepers’, ka jingpyndonkam ïa ki kor na ka bynta ka ‘Ultrasonic Flaw Detection’ (USFD), bad kiwei kiwei.
La ïoh jingtip ruh ba na ka liang ka NFR ka la lah ruh ban pynbiang ïa ki ‘System Monitoring & Predictive Maintenance Centre’ ha bun tylli ki jaka sangeh rel kiba dang hap hapoh ka jingkhmih jong ka NFR.
