Agartala, Jyliew:
Ki bor sorkar jong ka jylla Tripura ha ki khyndiat sngi kiba la leit noh, ki la pyntip ba ïa ka ïew khappud kaba don ha ka thaiñ Kamalasagar – Kasba, Sepahijala district yn sa plie trei kam biang ha u bnai u ban sa wan (Naitung, 2023). Ïa katei ka ïew khappud la khang khyrdep naduh ba ki por jong ka jingsdang ban saphriang jong ka jingpang COVID-19.
Na ka liang ki bor sorkar ki la pyntip ba ïa ka ïew khappud kaba don ha ka thaiñ Sabroom Division – South Tripura District la lah ban plie paidbah biang ha u bnai Jymmang u ba la leit.Kat kum ka jingïathuh jong u Sub-Divisional Magistrate (SDM) ka thaiñ Bishalgarh – Binoy Bhusan Das u la pyntip ba ha ka sngi Balang kaba la dep, ka Joint Border Haat Management Committee ka la dep ban pynlong ïa ka jingïalang ha ka shnong Kasba bad ha katei ka jingïalang ka la don ka la don ka jingïasyllok kaba bniah halor ki mat kiba ïadei bad ki sienjam ban plie biang ïa ka iew khappud ha ka thaiñ Kamalsagar – Kasba. Na ka liang u SDM u la pyntip shuh shuh ba ha ka jingïalang la ïasyllok ruh halor ki mat kiba ïadei bad ki sienjam ban pyntrei ïa ki kam maramot ha katei ka iew hashwa ban plie paidbah biang ïa ka.
Na ka liang u SDM u la pyntip shuh shuh ba ka kynhun sorkar kaba na sha shilliang pud jong ka ri Bangladesh lem bad ka kynhun sorkar jong ka ri India ha ka taiew ka ban wan kin sa leit ban jurip ïa ka ïew khappud Kamalasagar-Kasba na ka bynta ban pynbiang ïa ka mang tyngka kaba ïadei bad ki kam maramot ïa katei ka ïew.
U la pyntip ba ynda la pyndep ïa ki kam maramot, sa ïa kawei ka jingleit jurip yn pynlong da ka kynhun sorkar Bangladesh bad India ha ka taiew kaba nyngkong jong u Naitung na ka bynta ban shim ïa ka rai kaba khatduh na ka bynta ban plie biang ïa katei ka ïew khappud.
Haba ïakren bad ki lad pathai khubor, na ka liang u SDM u la pyntip shu shuh ba ka kynhun sorkar na Bangladesh ka la ai ïa ki dak kiba bha na ka bynta ban plie biang ïa katei ka iew khappud bad na ka liang ka Sorkar India ka don ïa ka jingkyrmen kaba skhem ba yn sa lah ban plie biang ïa katei ka ïew ha ka taiew ba khatduh jong u Naitung, 2023. U SDM u la pyntip shuh shuh ba na ka liang ki nongshong shnong na ki arliang khappud la slem ki la pynpaw ïa ki jingdawa ki jong ki ban plie biang ïa katei ka ïew khappud kaba don ha ka thaiñ Kamalasagar – Kasba.
