Shillong, Jylliew 11:
Ka Australia ka la jop ïa ka jingïakhun World Test Championship da kaba pynliem kput ïa ka India ha ka sngi kaba san jong ka jingïalehkai final kaba la long ha The Oval.
Ka jingkyrmen na ka bynta ka India ka la long kaba rit bha ban poi sha ka thong jong ka nam lahduh kaba donkam ban tied 444 bad kaba la don ha kti u Virat Kohli, uba la kamai 44 run ha kaba kut jong ka sngi kaba saw, ha kaba ka India ka la kamai 164 run bad hap 3 wiket, hynrei u Kohli ha ka sngi ba san um shym la lah ban shan bad hadien ba u la kamai 49 run, u la duh noh ïa la ka jong ka wiket.
Haba phai sha ka jingïalehkai, ka Australia ha ka pali kaba nyngkong ka la tied haduh 469 run bad ka India pat ka la tied tang 296. run. Hynrei ha ka pali kaba ar ka Australia ka la tied 270 run bad pynkut noh watla kam pat shym la hap lut ki wiket bad ban tam da 443 run ïa ka India, kaba la donkam pat ban tied 444 run hynrei ha ka pali kaba ar, ka India ka la lah ban tied tang 234 run bad hap lut ki wiket, kaba la pynlong ïa ka Australia ban jop syndon da 209 run ïa kane ka final bad rah syndon ïa ka nam lahduh jong ka jingïalehkai Test ha ka pyrthei.
U nam tam ka Australia ha ka jingkawang bol ha ka pali ba ar u dei u Nathan Lyon uba la khur haduh 4 wiket bad u Scott Boland u la khur lai tylli ki wiket kaba la pynlong ïa ka Australia ban lah ban tehlakam ïa ka India.
Kane ka jingshah rem kan dei ruh kaba ar sien kynthih ïa ka India ha ka final jong ka World Test Championship, kata hadien ba ka la shah pynliem noh ha ka New Zealand ha u snem 2021 kaba dei ruh ka sien ba nyngkong ba la pynlong ïa kane ka lympung.
