United States, Jylliew:
Na ka liang jong ka USA Cricket (USAC) ka pynpaw bad kren shai ba ka lympung ialehkai kriket jong ka T20 World Cup 2024 kam dei satia ban weng noh na ka ri ban pynlong ia katei ka lympung na ka daw jong ki jingkhuslai kiba lah ker tawiar tang namar ka jingduna ha kaba iadei bad ka jingpynbit pynbiang bad ki jingtei na ka bynta ka kam ialehkai kriket ha katei ka ri.
Hynrei kaba lah pynpaw pat ba ka jingjop ka jong ka na ka bynta ban pynlong ia ka Major League Cricket (MLC) ha u snem ban wan, khlem pep kan weng lut ia kita ki jingkhuslai baroh kaba ka ri ka don mynta. Shuh shuh ruh ka khubor ka iathuh ba ka International Cricket Council (ICC) ka lah ban pynkynriah noh ia katei ka lympung ialehkai na katei ka ri ia kaba lah dep pynbeit ban pynlong da ka jing-iatreilang da ka USA bad ka West Indies, sha ka ri England ha u snem ban wan. Pynban na ka liang jong ki nongkitkam jong ka USAC ki pynpaw ba kim pat shym la iohsngew ne ioh kano kano ka jingpyntip na ka ICC ha kaba iadei bad ka jingpynkynriah noh ia ka lympung ialehkai baroh kawei. Nalor kata, ki lah pynpaw ruh ba mynta ki lah ialeh katba lah ei na ka bynta ban pyniaid shakhmat ha ka jingpynkhreh kaba donkam ha kaba iadei bad ki jingtei bapher bapher na ka bynta ka T20 World Cup kaba dangsah mynta sa shisnem ha ka ban pynlong ia ka. Ki jingeh mynta ha kaba iadei badka jingpynlong ia ka jingpynkynriah noh sha kawei ka jaka bad kiwei kiwei ki jingdonkam ki long ki kam kiba ju iai jia bad laong na ka por sha ka por namar ka ri US kam shym la don ha kano kano ka bynta ban ioh ia ka hok ha ka ban pynlong ia ki rynsan ialehkai Kriket, hynrei kaba don pat mynta ia ka Major League Cricket ka ban sa long shen badka jingseisoh jong ka ri ha ka jingioh ban pynlong ia ka T20 kan weng lut ia ki jingeh baroh na ka bynta banpyniaid beit shakhmat ia ki kam.
Kumba ka paw hi ka long ba ka sngi plie pyrda ia ka Major League Cricket T20 kan sdang nadh ka 13 tarik u Naitung badka ban sa pynhap pyrda noh ha ka 30 tarik jong utei ujuh u bnai. Kumta ha katei ka lympung ialehkai yn don hynriew tylli ki kynhun ialehkai bad baroh ki jingialehkai yn pynialehkai ha Grand Prairie Stadium kaba ha Texas. Ha jingshisha kumba ka long mynta, bun na ki khlur ialehkai ba pawkhmat ha ka pyrthei kum u rangialehkai ka England u Jason Roy, Adam Zampa(Australia), Matthew Wade, Marcus Stoinis bad Moises Henriques ki lah dep ban iasoi na ka bynta ka jingshimbynta jong ki ha ka MLC T20. Ha ka jingshisha, ka ICC ka lah shim ia ka bynta ha ka jinglah ban pynurlong ia kino kino ki sienjam na ka bynta ban pynkynriah ia ka T20 World Cup na ka West Indies bad na USA bad haduh mynta kam pat shym la don kano kano ka jingiakren ne iamir jingmut halor katei ka kam.
Kumjuh ruh ka kynhun ialehkai kriket na India ka lah dep ban ialehkai ha ki katto katne ki jingialehkai bar-ri ki jong ka ha Central Broward Park ha Lauderhill, Florida pyrshah ia ka West Indies. Shuh shuh ruh ka Oakland, Florida bad Los Angeles ki long ki katto katne ki shnong kiba lah shah jurip ha ka kynhun wan jurip jong ka ICC kaba dei bad ki madan ialehkai na ka bynta ban long ki pdeng-duh na ka bynta ban pynlong ia ka lympung ialehkai.
