Itanagar, Jylliew:
Ki bor sorkar jong ka Namdapha National Park & Tiger Reserve ha ki khyndiat sngi kiba la dep ki la leit ban pynpra noh ïa kawei ka jingtei kaba beaiñ kaba la pynïeng bad shna ha ka kawei ka jaka kaba don marjan bad ka thaiñ 40 Burma Nallah – ha shi lynter ka surok Miao – Vijaynagar, Changlang district.
Ïa ka jingleit pynpra ïa katei ka jingtei ba beaiñ la ïalam khmat da u Field Director Aduk Paron bad u Gandhigram Range Forest Officer – Son Yowa Hade.
Kat kum ka kyrwoh ba la pyllait da ka tnat sorkar la ïathuh ba kat kum ka hukum ba la pyllait da ka sorkar jylla, ka thaiñ 40 Mile (Burma Nallah) ka dei ka thaiñ kaba dang hap hapoh u pud u sam jong ka Namdapha National Park & Tiger Reserve. Kumto, na ka liang ka sorkar ka khang pyrshah ban tei ïa kino kino ki jingtei hapoh u pud u sam jong katei ka jaka.
Na ka liang ka tnat sorkar ka la pyntip shuh shuh ba ki don haduh 8 tylli ki shnong kiba la shong la sah da ki paid Lisu – kiba dang hap hapoh u pud u sam jong ka Namdapha National Park & Tiger Reserve, bad na ka liang ka Sorkar India ka la pynbna ba kan pynbiang ruh da ki song jingïarap na ka bynta ki paid Lisu ba kin mih noh na katei ka jaka. La pyntip ruh ba katba ïa katei ka song jingïarap ym pat shym la pyntreikam – ki bor sorkar jong ka Namdapha kim lah ban leit pynlong ïa kino kino ki jingleit pynmih beaiñ ïa ki nongshong shnong ne ban pynthut ïa ki. La pyntip shuh shuh ba ïa kino kino ki jingtei kiba thymmai ha ka thaiñ lait noh ha kitei ki 8 tylli ki shnong – ki bor sorkar kin don ïa ka bor ban leit pynpra bad pynmih ïa ki nongshong shnong beaiñ.
