Shillong, Jylliew 11:
Ka Shillong Lajong Football Club bad ka Mawlai Sports Club ki la khur ïa ka jingjop ha ka wat nyngkong (first leg) jong ka jingïakhun semi-final ka lympung Meghalaya State League (MSL) 2023.
Ka Shillong Lajong ka la lah ban pynliem noh ïa ka Rangdajied United Football Club da 3-0 kol ha ka jingïalehkai kaba la long ha madan Kiang Nangbah Stadium, Jowai. Kane ka jingjop da 3-0 kol, kan ai mynsiem bha ïa ki rangïalehkai ka Shillong Lajong ha ka wat ba-ar (second leg) ka ban long ha ka 13 tarik mynta u bnai na ka bynta ban ïoh rung sha ka final jong kane ka lympung.
Haba phai sha ka jing -ïakhun ha Jowai, ka Shillong Lajong ka la ïoh thep ïa ka kol ba nyngkong lyngba u Henry Ford Nongneng ha ka minit kaba 17. U Hardy Cliff Nongbri u la thep ha ka minit kaba 55 katba ïa ka kol ba lai la kum thep bakla hi da u rangïalehkai ka Rangdajied ha ka minit kaba 82.
Ha kane ka jingïa-khun, ka Rangdajied ka la hap ban ïalehkai sa tang 10 ngut ki rangïalehkai naduh ka minit ba 78 hadien ba u Aibiangmame Nengnong u la shah sei ‘red card’ hadien ba ïoh pdiang ar tylli ki ‘Yellow Card’.
Ka Rangdajied kan hap ban ïalehkai bha ha ka wat ba-ar (second leg) ka ban long ha ka 13 tarik ha Mawkyrwat ban don kano kano ka lad ban ïoh rung sha ka final, kan hap ban jop beit da kham bun kol.
Haba phai pat sha ka jingïalehkai semi-final kaba la long ha PA Sangma Stadium ha Tura, ka Mawlai ka la jop da ka said ïa ka Khliehmawlieh kata da 1-0 kol. Ïa kane ka jingïakhun la wan ban sakhi ym tang da ki paidbah hynrei kynthup ruh ïa ka MP ka Tura, ka Agatha Sangma kum ka Kongsan.
Ka jingïakhun ka la long kaba ïakhaid bha ha ka kylla step hynrei dei ha ka minit kaba 50 ba ka Mawlai lyngba u Wanboklang Lyngkhoi, ka la ïoh ban pynkhih jar bad kaba la biang pura ban khur jingjop.
Ka jingïakhun jong ka wat ba-ar hapdeng ka Mawlai pyrshah ïa ka Khliehmawlieh kan long ha nongbah Shillong ha ka sngi Ba-ar. Kumta baroh ar tylli ki kynhun ki hap ban ïakhun tyngeh namar ka jingjop ka Mawlai ruh kam long kaba heh naba baroh arliang ki don ka lad ban ïaknieh rung sha ka final.
