Shillong, Jylliew 11:
Ka jingangnud bad phoh-sniew ba la slem jong ka Manchester City ban rah ïa ka nam lahduh ka lympung Champions League ka la wan urlong hadien ba ka la lah ban pynliem noh ïa ka Inter Milan ha ka final jong kane ka lympung kaba la long ha Istanbul.
Ka jingïoh rah jong ka Manchester City ïa ka nam lahduh, ka la pynlong ruh ïa kane ka kynhun hapoh ka jingkhmih jong u Pep Guardiola ban ïoh rah syndon ïa ki lai tylli ki nam ba heh ne ka ‘Treble’, kata ban rah ïa ka Cham-pions League, Premier League bad ka FA Cup.
Ka Manchester City ka la kylla long ruh ka club kaba ar hapoh England ban lah ban jop ïa baroh lai tylli ki nam lahduh, hadien ba ïa kane ka thong la dep ban rah shwa da ka Manchester United ha u snem 1999 bad kane ka jinglah ka City ban bat lang ïa kane ka kyrdan ka la wan lyngba ka shi kol ba la khyrwit da u Rodri ha ka minit ba 68 ban pynlong ïa ka City ban rah syndon ïa ka nam lahduh ka Champions League ha ka sien kaba nyngkong eh.
Ka City kaba la lah ban ïalehkai bha ha ki jingïalehkai baroh ha ki lympung bapher bapher jong kane ka aiom hynrei haba phai sha ka jingïakhun final jong ka Champions League, kam shym la lah ban don ha kata ka kyrdan ba ka ju long hynrei hap ban ïakhun tyngeh khamtam lei hadien ba ka la duh noh ïa u Kevin de Bruyne namar ka jingshitom ha ka kylla step.
Kane ka nam lahduh ka la pynlong ruh ïa ka kyrdan jong u Guardiola, kum uwei na ki manager ba tbit tam, ha kaba u la lah ruh ban khur ïa ka nam lahduh kaba lai jong ka Champions League, kata ar sien bad ka Barcelona, kaba khatduh ka la wan ha u snem 2011.
