Shillong, Jylliew 11:
Hadien hynriew tylli ki bnai kiba la lah ban thaw rekod, u Julian Alvarez ka Manchester City u la ïoh ban buh jaka ïalade ha ka khana pateng (history) kum u rangïalehkai ba nyngkong ban jop ïa ki lai tylli ki nam lahduh, kita ka nam lahduh jong ka dewbah Europe, ka Premier League bad ka FA Cup bad kumjuh ruh ka lympung World Cup ha kajuh ka aiom ïalehkai.
Ki la don haduh khyndai ngut ki rangïalehkai shwa jong une u rangïa-lehkai shakhmat ba dang 23 snem ka Argentina, kiba la jop ka nam lahduh jong ka dewbah Europe ne ka Champions League bad ka World Cup ha kajuh ka aiom hynrei ym don pat uwei ruh ban jop pat ïa ki nam lahduh jong ki club ha ki ri ba ki ïalehkai ne ki ‘domestic cup double’.
U Alvarez u la pynkut ïa kane ka aiom kum u nongthep kol ha ka kyrdan kaba ar na ka bynta ka City kata ban thep 17 kol, kata ruh wat haba u la ïoh ban ïalehkai tang khyndiat ki jingïalehkai bad uba la don ruh ha ka kyrdan kaba 3 kum u ‘top scorer’ ha ka lympung World Cup 2022.
U Alvarez u la don bynta bad ka City ban jop ïa ka nam lahduh ka Premier League da 5 point na ka Arsenal, pynliem ïa ka Manchester United ha ka final ka FA Cup bad ban jop da 1-0 kol ïa ka Inter Milan ha ka final ka Champions League, bad kumjuh ruh ha ka jingjop ka Argentina ïa ka France ha ka World Cup final ha u bnai Nohprah.
U Alvarez u la kylla long u rangïalehaki ba 10 ban dei u European champion bad ka club ka jong u bad kum u world champion bad ka ri ka jong u, kata ha kajuh ka aiom. Lada dei ba ka Inter kan jop, u rangïalehkai shakhmat ka Argentina u Lautaro Martinez u la dei ban kylla long uba 10.
Napdeng ki khyndai ngut, hynriew ngut ki la dei na ka club Bayern Munich bad ruh jong ka Germany ha u snem 1973-74 katba lai ngut kiwei pat ki la dei ba ïalehkai na ka bynta ka Real Madrid ha ki snem kiba pher ha ki lympung Champions League.
U Hans-Georg Schwar -zenbeck, Gerd Muller, Ulrich Hoeness, Paul Breitner, Josef Maier, Franz Beckenbauer ki la jah poi sha kane ka thong. Ka Bayern Munich ka la jop ïa ka European Cup bad ka Bundesliga ha u snem 1974, hynrei ka la liem noh ha ka semi-final jong ka German Cup.
Kumjuh u Christian Karembeu, uba la jop World Cup bad ka France ha snem 1998, u Roberto Carlos bad ka Brazil ha u snem 2002, bad u Raphael Varane bad ka France ha u snem 2018, ki la jop ïa ka World Cup bad ka Champions League ha ujuh u snem na ka bynta ka Real Madrid.
