Shillong, Jylliew 11:
U Novak Djokovic u la kylla long u rangïalehkai tennis ba nyngkong eh ha ka pyrthei ban ïoh rah ïa ki nam lahduh ba heh ne ki Grand Slam, kaba la kot shaduh ka 23 tylli ha ka jingim ïalehkai ka jong u.
Kane ka jingïoh jong u Djokovic ban thaw ïa ka rekod kaba thymmai ka la wan hadien ba u la ïoh rah biang ïa ka nam lahduh ka lympung French Open da kaba pynliem ïa u Casper Ruud uba na Norway ha ka final da 7-6 (7-1) 6-3 7-5.
Kane ka jingjop bad rah nam lahduh ka la pynlong ruh ïa u Djokovic ban tam ïa ka nam lahduh ba la bat da u Rafael Nadal (22 tylli) ha ka liang ki shynrang. Kumba ka long mynta pat, u Djokovic u la ïa ryngkat bad ka Serena Williams haba phai pat ha ka jingïoh rah bun ki nam lahduh jong ki nongïalehkai tennis kynthei bad shynrang, bad kaba dang don hakhmat ban rah bun ka nam lahduh, dei ka Margaret Court kaba la khur 24 tylli.
U Djokovic un don ka kabu ban pynïaryngkat ïa ka jingkhur ka Margaret ha ka lympung Wimbledon ka ban long ha u bnai ban wan.
Nalor kane, u Novak Djokovic u la kylla long ruh u rangïalehkai ba nyngkong eh ban jop baroh saw tylli ki nam lahduh ba heh haduh lai lai sien.
