Ieh noh u Myntri barim jong ka Sorkar Mizoram ïa ka seng Congress

Aizawl, Jylliew:

U Myntri barim ka tnat Kam Rep Kam Riang jong ka Sorkar Mizoram u ba dei ruh u nongïalam ba rangbah jong ka seng Congress, u KS Thanga ha ki khyndiat sngi kiba la dep u la ieh noh ïa ka seng Congress na ki daw shimet ki jong u.

Katei ka jingieh noh kam jong u KS Thanga ka la wanrah ïa ka jingeh kaba khraw na ka bynta ka seng Congress namar ba ki seng saiñ pyrthei bapher bapher jong ka jylla Mizoram ki dang don hapdeng ka jingpynkhreh na ka bynta ka ilekshon sha ka Ïing Dorbar Thaw Aiñ jong ka jylla kaba la buh ban pynlong ha ki bnai ba khatduh jong une u snem ba mynta.

Kat kum ki jingïoh lum khubor la ïathuh ba na ka liang u KS Thanga u la leit ban aiti ïa ka shithi ieh noh kam ka jong u kum u dkhot jong ka Mizoram Pradesh Congress Committee (MPCC) sha u President jong ka seng – Lalsawta ha ka 9 tarik mynta u bnai.

U KS Thanga u dei u dkhot ka Political Affairs Committee (PAC) jong ka seng Congress, kaba la shah pyndam noh dang shen ha u Lalsawta.

Ha ka shithi ieh noh kam, na ka liang u KS Thanga u la batai ïa 7 tylli ki mat kiba ïadei bad ki daw jong ka jingieh noh jong u ïa ka seng Congress.

Na ka liang ka jong u, u la kynthoh pyrshah ruh ïa u Lalsawta u bym shym la bud ïa ki kyndon treikam jong ka seng Congress kaba la wanrah ruh ïa ka jingieh kam jong u Lal Thanhawla ha u snem 2021 hashwa ban kut ka samoi trei kam.

Kum ban shu ïathuh hangne, u KS Thanga u la leit ban pynïasoh ïalade bad ka seng Congress ha u snem 1994 bad u la shah jied ban long nongmihkhmat jong ka jylla la ar sien kynthih hapdeng u snem 2008 bad 2018.

U la shah pynkupbor kum u parliamentary secretary jong ka seng Congress 8 snem hashwa ba un ïoh bat ïa ka shuki Myntri jong ka Sorkar Jylla.