Jowai, Jylliew 12:
Ka Khliehshnong Ïalong bad ka Chyrmang Wah ki la khur jingjop, katba ka Myrjai bad ka Newhill ki la ïasam mar shi dor-thong (point) ha ka lympung ïalehkai Third Division Football Tournament kaba tip kum ka 3rd U Adelbert Loloo Memorial Trophy.
Ïa kane ka lympung ïalehkai la pynïaid da ka West Jaiñtia District Sports Association (WJDSA) ha madan Kiang Nangbah Stadium ha ka Lah Sngi U Blei.
Ha ka jingïalehkai kaba nyngkong, ka Khliehshnong Ïalong ka la pynliem ïa ka Mookaswan Dongñein lyngba ka shi kol ba la thep da u Saiñhikiru Pale ha ka minit kaba 8.
Ha ka jingïalehkai kaba bud, ka jingïakhun hapdeng ka Myrjai pyrshah ïa ka Newhill ka la kut hapdeng ka jingïakhaid hadien bym shym la don ba lah pynkhih jar.
Ha ka jingïakhun kaba khatduh, ka Chyrmang Wah ka la pynliem ïa ka Salaroh da 3-0. Ïa kine ki kol la thep da u Niwan Syad ha ka minit kaba 8, u Wanskem Khlem 38 bad u Lamki Dkhar ha ka minit kaba 63.
Ka jingïakhun ha ka sngi Ba-ar kan long hapdeng ka Lumbhahdakha pyrshah ïa ka Moodop Royal ha ka por 12.30 mynsngi, ka Catholic Youth Mihmyntdu ïa ka Riatsaliya Mihmyntdu ha ka por 2 baje bad ka Mookyrdup ïa ka Mupliang ha ka por 3.30 janmiet.
