Shillong, Jylliew 12:
Ka lympung ïalehkai State Level Under-12 Football Tournament 2023 ba la pynïaid da ka tnat ïalehkai ka Sorkar Jylla, ka la sdang ha ka Lah Sngi U Blei ha SAI Training Centre da ka jingwan ïashim bynta da ki kynhun bapher bapher na ki district jong ka Jylla.
Ha kane ka jingïakhun jong ki khynnah shynrang, ka West Jaiñtia Hills ka la pynjem khnap ïa ka East Garo Hills haduh 8-0 kol. U Benedik War u la khur ïa ka hat-trick hadien ba u la ïoh ban thep ha ka minit kaba 40, 43 & 45. Kumjuh u Ibamonhi Suting (16 & 46) u la ïoh ban thep ar kol. Katba ïa ki shi kol la thep da u Ram Passah (10), Shamiki Myrchiang (41) bad u Lodestar Mukhim (50).
Kumjuh ka Ri-Bhoi ka la jop da 8-1 kol pyrshah ïa ka South West Garo Hills. U Prinlang Roy L. Nonglait u la khur ïa ka hat-trick hadien ba u la thep ha ka minit kaba 2,11 & 20. Ïa ki ar kol la thep da u Rikiiame Shylla (9 & 17) bad u Ïaishanborlang Khongjee (43 & 46), katba ïa ka shi kol la thep da u Same Daskhem Sylliang (12). U Wegrim A. Sangma (41) u la lah ban pynphai kylla shi kol na ka bynta ka South West Garo.
Ka West Khasi Hills ka la jop da 2-1 kol pyrshah ïa ka Eastern West Khasi Hills. Ïa kine la thep da u Gilbert Snaitang ha ka minit kaba 11 bad u Ïainehskhem Lyngdoh ha ka minit kaba 40, katba u Arki Mawlong (50) u la lah ban pynphai kylla shi kol na ka bynta ka Eastern West Khasi Hills.
Ka East Khasi Hills ka la pynliem ïa ka South West Khasi Hills da 5-2 kol. U Arkimeai Mawlong ha kane ka jingïalehkai u la ïoh ban thep marwei haduh saw kol ha ka minit kaba 4,5,21 & 45 bad u Bankyrshanbor Kharkongor u la thep shi kol ha ka minit kaba 14. U Shempaul Ïawphniaw (17) bad u Ainesreward Shangdiar (49) ki la lah ban pynphai kylla na ka bynta ka South West Khasi Hills.
Haba sha ki jingïakhun jong ki khynnah kynthei, ka West Khasi Hills ka la pynliem noh ïa ka East Garo Hills haduh 10-0 kol. Ka Nazarine D. Sangma ka la khur ïa ka hat-trick ha kaba la thep lai kol ha ka minit kaba 20, 25 & 48. Ïa ki ar kol la thep da ka Ibatyngkai Nongsiej (16 & 41), Ineshabanbet Diengdoh (8 & 28) bad ka Anisha D. Sangma (37 & 50), katba ka Chuesa Ch. Momin (East Garo Hills) ka la ïarap pynthep sa shi kol na ka bynta ka West Khasi Hills ha ka minit kaba 47.
Ka East Jaiñtia Hills ka la pynliem noh ïa ka Ri-Bhoi lyngba ka shi kol ba la thep da ka Felinda Pajuh ha ka minit kaba 20.
Ka East Khasi Hills ka la pynjem khnap ïa ka North Garo Hills da 7-0 kol. Ka Nabaphylla Majaw ka la khur ïa ka hat-trick hadien ba ka la ïoh ban thep ha ka minit kaba 18, 35 & 43. Katba ïa ki shi kol la thep da ka Daisy Kharsahnoh (7), Lateidaka Mukhim (13), Labuhti Khongsngi (25) bad ka Ginialarissa Diengdoh (33).
Ka South West Khasi Hills ka la pynliem noh ïa ka South Garo Hills da 4-0 kol. Ïa kine la thep da ka Aisukshisha Syiemlieh (10), Deiphiwansara Lyngkhoi (10), Badapynhun Dkhar (39) bad ka Ridashisha Kharlyngdoh (41).
