England, Jylliew:
Ka long ka jingjop kaba ar na ka bynta u khlur ialehkai Tennis ka ri Bilat u Andy Murray ban khur mynta ia ka trophy na ka ATP Challenger Tour jong ka aiom ialehkai ba mynta. Kane ka wan hadien ba utei u rangialehkai u lah rah ia ka thong jingjop na ka Surbiton Trophy kaba long ha la iing.
Kumta ha kaba iadei bad katei ka jinglah ban khur jingjop, ka khubor ka iathuh ba u Andy da kaba iakhun tyngeh ha ka phainal, u la lah ban pynliem noh ia u Jurij Rodionov da 6-3, 6-2. Shuh shuh ruh u Murray u lah sei ia ka rukom ialehkai ba kynsai bad ba paw ka jong u, da kaba pynkhlain shuh shuh ha ka kam sam bol bad kiwei pat ki bynta jong ka jingiakhun. Kumjuh ruh ki 83% (29/35) jingjop ha ka jingkhur ia ki dor-thong jong ka jingsam bol ba nyngkong bad pyndonkam ruh ia ka rukom tied kaba khampher ha kaba u la lah ban thaw kloi halade ia ki 3-1 jingjop shakhmat ha ka set iakhun kaba ar hadien ba u lah khur ia ka jngjop ha ka set ba nyngkong na ka bynta ban pyndep ia ka jingialehkai ha shuwa ban hap u slap.
Haba phai sha u rangiakhun pyrshah jong u ka long ba u Jurij u lah ialehkai bha naduh kaba sdang jong ka jingshimbynta jong u ha ka lympung kaba lah neh baroh shi taiew, ha kaba u lah khur da kaba suk ia ka jingjop ha baroh ki jingialehkai jong u bad ruh uba lah ialehkai bha wat ha katei ka jngiakhun phainal bad u Murray ha shuwa ba un mad ia ka jingshah pynrem. Kumba ka paw haduh mynta ka long ba u Murray u shong mynta ha ka jak aba 44 ha ka ATP Live Rankings bad u ban sa iakhun pat sa ha ka Challenger event ha Nottingham.
