Rung semi final ki kynhun ïalehkai phutbol ha ka National School Games

Kumta kane ka kynhun kan pynkhreh ïa ka jingïakhun semi final ha ka Sngi Ba-ar pyrshah ïa ka Kerala ha ka por 9 baje mynstep.

Shillong, Jylliew 12:

Ki kynhun ïalehkai phutbol U-19 ka Jylla ki la don jingkyrmen ban khur takma ha ka National School Games hadien ba ïoh rung sha ka semi final ha ka Lah Sngi U Blei ha Bhopal, Madhya Pradesh.

       Ha ka jingïakhun quarter final, ka kynhun ki rangïalehkai hapoh ka jingïalam u Bah Jeffrey Warlarpih (coach) ka la lah ban pynliem noh ïa ka Maharashtra da 5-3 kol.

       Kumta kane ka kynhun kan pynkhreh ïa ka jingïakhun semi final ha ka Sngi Ba-ar pyrshah ïa ka Kerala ha ka por 9 baje mynstep. Lada ka Meghalaya kan khur ïa ka jingjop, kan hap ban pynkhreh sa ïa ka jingïakhun final ha ka por janmiet jong kane kajuh ka sngi.

       Katba ha kawei pat ka jingïakhun quarter final kaba la long mynta ka miet, ka kynhun ki ’thei ïalehkai hapoh ka jingïalam ka Kong Ïaikyntiew Nongkynrih (coach) ka la lah ban pynliem noh ïa ka Gujarat lyngba ka tie-break da 5-3 kol.

       Haba phai sha ka jingïaid lynti jong kane ka kynhun naduh kaba sdang jong kane ka lympung, la  ong ba ha ka jingïalehkai ki shynrang ka Meghalaya ka la ïakhaid mar 1-1 kol pyrshah ïa ka Punjab bad ka la jop da 1-0 kol pyrshah ïa ka Gujarat. Ha ka pre-quarter ka la jop da 1-0 kol ïa ka Delhi. Katba ha liang ki kynthei, ka Meghalaya ka la shah rem ha ka Haryana da 3-0 kol, hynrei ka la wanphai da ka jingjop haduh 13-0 kol pyrshah ïa ka Uttarakhand bad ha ka pre-quarter final ka la jop da 5-2 kol ïa ka Pondicherry.

       Kum ban shu pynkynmaw, ka Jylla ka la khur tang kawei ka takma rnong ha kane ka lympung lyngba ka nongïalehkai High Jump ka Rinalis Ingti kaba lah ban kynthih haduh 1.55m.