Agartala, Jylliew:
Ki paid Meitei kiba shong ba sah ha ka jylla Tripura ha kane ka taiew kaba mynta ki la pynlong da ka jingïaïaid paidbah ban ïawer na ka bynta ka jingwanphai jong ka shong suk shong saiñ ha ka jylla Manipur kaba la don mynta hadpeng ki jingïakynat bad jingïakajia kiba jur kiba la jia naduh u bnai ba la dep.
Da kaba ïawer na ka bynta ka shong suk shong saiñ jong ka jylla, ki paid Meitei kiba shong ba sha ha Tripura ki la pynpaw ruh ïa ka jingpyrshah kaba jur halor ka jingdawa jong ki paid riewlum ban phiah ïa ka jylla Manipur ha ki 2 bynta.
Kat kum ki jingïoh lum khubor la ïathuh ba na ka liang ki paid Meitei kiba shong ba sah ha Tripura ki la pynlong da ka jingïaïaid paidbah ha Agartala hapoh ka lama trei kam jong ka Puthiba Welfare and Cultural Society bad All Tripura Meitei Community.
Na ka liang kitei ki 2 tylli ki seng ki la dawa ruh ba u Myntri Rangbahduh jong ka ri – Narendra Modi u dei ban shim ïa ki sienjam kiba kynsai ban leit tuklar halor ki jingïakajia ha ka jylla Manipur khnang ban wanrah biang ïa ka shong suk shong saiñ ha ka jylla Manipur.
Kum ban shu ïathuh hangne la ïathuh ba ka jylla Manipur naduh ka 3 tarik jong u bnai Jymmang ka la don hapdeng ki jingïakynat kiba jur hapdeng ki paid Kuki bad ki aid Meitei.
Ha kitei ki jingïakajia la ïathuh ba ki la don ruh haduh kumba 100 ngut eiei ki briew kiba la duh ei ïa la ki jong ki jingim bad da ki hajar ngut kiwei pat ki nongshong shnong kiba la hap ban mih jyndat noh na la ki jong ki ïing ki sem ban leit wad jaka rieh sha kiwei kiwei ki jylla jong ka thaiñ shatei lam mihngi jong ka ri.
Halor kitei ki jingïakajia, na ka liang ki seng/kynhun riewlum kiba na ka jylla Manipur ki la kynnoh ba u Myntri Rangbah ka jylla – N Biren Singh, ka tnat pulit jong ka jylla bad ki 2 tylli ki kynhun treikam kiba na ka jaitbynriew Meitei ki la don bynta ban theh umkhluit ban pynjur shuh shuh ïa ki jingïakajia bad jingïaumsnam ha ka jylla Manipur.
