Guwahati Jylliew:
Ki bor pulit jong ka jylla Assam ha ka 12 tarik mynta u bnai ki la pyntip ba ki la ïoh ban kem ïa uwei u runar u ba la donkti ha ka kam beaiñ ban pynïap ïa kawei ka nongïalam jong ka seng Bharatiya Janata Party (BJP) na ka thaiñ Goalpara, Assam. Kat kum ka jingïathuh jong ki bor pulit, ki la pyntip ba ïa ka metïap jong ka Jonali Nath, ka nongïalam jong ka seng Bharatiya Janata Party (BJP) kaba dei ruh u secretary jong ka BJP Goalpara district committee, la ïoh ban tam najan ka surok bah NH-17 kaba don ha ka shnong Shalpara, Krishnai.
Hadien katei ka jingjia la ïathuh ba ka la wanrah ïa ka jingpynrem kaba jur na ki shnat trei kam bapher bapher jong ka jylla Assam kiba la dawa ruh ba dei ban pynlong da ka jingtohkit kaba bniah halor katei ka jingshah pynïap jong ka Jonali Nath. Dei hadien ba ki bor pulit jong ka jylla ki la sdang ban pynlong ïa ki jingtohkit ba ki la ïoh ban kem noh ïa uwei u runar u ba la suba jur ba dei ma u uba la donkti ha katei ka kam beaiñ.
U runar u ba la shah kem u dei u ba la tip kyrteng kum u Hasanur Islam – u trai jong kawei ka dukan die jaiñ kaba don ha Matia Bazar, Goalpara district. Ïa utei u runar la ïathuh ba la leit ruh ban rah tian bishar sha kawei ka ïïng kashari kaba don ha ka thaiñ Goalpara.
Hadien katei ka jingjia shah pynïap jong ka Jonali la ïathuh ba na ka liang ki nongïalam bapher bapher jong ka seng BJP ki la leit ban jngoh ïa ka ïïng sah jong ka Jonali ban pyntngen ïa ki bahaïing hasem jong ka bad kumjuh ruh ban leit ai ïa ka kyrwoh sngewlem.
Halor katei ka jingjia, na ka liang u President jong ka BJP Assam – Bhabesh Kalita u la pyntip ba ïa ka jingtohkit kaba bniah yn sa pynlong halor katei ka jingjia. U la ïathuh shuh shuh ba sa kiwei kiwei ki runar kiba donkti ha katei ka kam bymman kin sa shah kem baroh ha ki bor pulit jong ka jylla bad ïa ki ka sorkar kan sa ai da ka jingpynshitom kaba tyngeh.
