Shillong, Jylliew 13:
Ka kynhun ki ‘thei ïalehkai phutbol jong ka ri ka la kynjoh mynta sha ka kyrdan ba 60 kat kum ka jingpyllait kyrwoh da ka FIFA ïa ki kyrdan ïalehkai jong ki ri ka pyrthei.
Kham ha shwa kane ka kynhun jong ka ri ka la don ha ka kyrdan ba 61 ha u Lber mynta u snem bad mynta ka la jam da shi kyrdan. Kane ka jingkyntiew kyrdan da ka FIFA ka long kat kum ki jinglah ban ïalehkai bha dangshen ha ki lympung ïalehkai bar ri.
Lah ban pynkynmaw ba ka India ka la ïoh bat ïa ka kyrdan ba heh duh ka dei ha ka kyrdan ba 49 ha u snem 2013 bad hadien ka shah pynhair sha ka kyrdan ba 63 ha u 2019. Ym don ka jingsngwphylla ba ka India kam shah pynhiar kyrdan bad kawei na kine ka dei ka jingshah rem da 3-2 kol ha ka Uzbekistan ha ka jingïalehkai paralok.
Ka jingkyntiew ïa ki kyrdan ka long ka jingjop jong ki ‘thei ïalehkai ka ri. Ka jingjop ïa ka Kyrgyz Republic ha ka Women’s Olympic Qualifier na ka bynta ka Paris 2024 da 4-0 kol ka la long ka jingïarap ïa ka kynhun ba kan nangkiew shaphrang.
Kiwei pat ki jingïalehkai ki ban wan pyrshah ïa ka Japan bad Vietnam kin long kiba kham eh. Kane ka kynhun hapoh ka jingïalam u Thomas Dennerby ka donkam ban pynkhreh bha na ka bynta kitei ar tylli ki jingïakhun pyrshah ïa ki kynhun kiba don ha ka kyrdan ba 11 bad 32 ha ka pyrthei.
Kine ar tylli ki jingïakhun ki ban wan kin long kiba kham eh, hynrei na ka liang ki paidbah nongkyrshan kin ïai ai ka jingkyrshan kaba pura khnang ba kan lah ban pynurlong ïa ka India ba kan ïoh rung sha ka Olympic ka ban long ha u snem ban wan ha Paris.
