C. B. Iawphniaw
Kane ym dei ba nga pyrshah ia ka ai jait kpa ne ia ka ai jait kmie ruh. Hynrei ngi dei ban don da bishar bad peit ia ka jingkiew bad jingtrei haka jaitbynriew ba ai jait kpa (shynrang) haba ia nujor bad kiba ai jait kmie. Ki jait bynriew kiba ai jait kpa ki roi parum pareh kum u shyiap ka duriaw. Katba ngi ki Khasi kiba ai jait kmie ngi nang ran dien katba nangmih ki sngi ki ia. Bad kane ka lah ban duh jait noh ha ka pateng ka ban wan, lada ngim lah ban khang lad ia ka jingai jait kmie ia ki khun na ki kpa bym dei Khasi. Ka jingai jait kpa ka dei ka jingpynkup burom ia u Blei nongbuh nongthaw ia ngi ki briew. Kumta ngi dei kein ban don ka jingkylla ha kane ka rukom ai jait kmie ruh, ban kham kiew ka jaitbynriew. Bad ym dei ba ngin shu ia bat sah ia kajuh. Namar ma ngi ki briew ngi kwah jingkylla ha kiei kiei baroh. Haba phai ha ka jaitbynriew Rajput ha ki por mynshuwa ki iathuhkhana ha ri India. Kine ki jaitbynriew ki don ka dustur ka riti ba lada u tnga u iap noh, ka tnga ruh kan shah thang im lang noh bad u tnga ha ka ding ba rhem. Kum kane ka dustur hato ka shongnia ban dang pynneh? Em, ia kane ka dustur ka riti kaba sniew dei ban pynduh noh na ka bynta ka jingbha lang kum ka jaitbynriew. Lada shim ia ka jingbun paid lei ka ai jait kpa ka la tam kput ha kylleng, ki ri ka pyrthei. Kane ka ai jait kmie kam lah ban pynkut bad kiba ai jait kpa. Lada ka sniew ka ai jait sha u kpa ne shynrang, kumta kito ki jaitbynriew ba ai jait kpa ki la dei ban pynkylla noh sha ka ai jait kmie ha kane ka snieh pyrthei. Ka don ka jingshisha ba kaba ai jait kpa ka kham lah ia ka ai jait kmie. Namar ka ai jait kpa ka kyntiew ia ka jaitbynriew sha ka roi ka par ha kiba bun ki liang.
