Guwahati, Jylliew:
Ki bor pulit jong ka jylla Assam ha ki khyndiat sngi kiba la leit noh ki la pyntip ba 2 ngut ki briew (kynthup kawei ka longkmie) ki la duh ei ïa la ki jong ki jingim na ka jingjia shah tylliat rel kaba la jia ha ka thaiñ Karimganj district, Assam.
Kat kum ka jingïathuh jong ki bor pulit ki la pyntip ba katei ka jingjia ka la jia ha kawei ka shnong kaba don hapdeng ka Baraigram bad Kanaibazar railway station – Karimganj district ha ka por kumba 2:40 AM ha ka miet jong ka Sngi Thohdieng ba la dep.
Ki 2 ngut ki briew kiba la duh ei ïa la ki jong ki jingim na katei ka jingjia ki kynthup ïa u Jayanta Das bad ka Archana Nath. U Jayanta u dei u nongshong shnong ka thaiñ Chandrapur, Bazaricherra katba ka Archana pat ka dei ka nongshong shnong jong ka thaiñ Baraigram.
Kat kum ki jingïoh lum khubor la ïathuh ba na ka liang ki bor pulit ka Baraigram outpost ha ka step jong ka Sngi Saitjaiñ ba la dep ki la leit ban shimti noh ïa kitei ki 2 tylli ki metïap bad phah noh ïa ki sha Karimganj civil hospital na ka bynta ban pyndep ïa ka ‘post-mortem’.
Halor katei ka jingjia, na ka liang ki bor pulit ki la pyntip ba ki la dep ban pynrung da ka mokotduma khnang ban pyndep ïa ki kam tohkit kiba dang sah.
