Agartala, Jylliew:
Ki bor sorkar jong ka jylla Tripura ha ka 11 tarik mynta u bnai ki la pyntip ba ki pulit jong ka jylla ki la ïoh ban kem ïa 5 ngut ki nong Bangladesh na ka rel Humsafar Express kaba dang thmu ban leit sha ka nongbah Bengaluru. Katei ka rel ka dei kaba dang sangeh ha Dharmanagar railway station, Tripura.
Kat kum ka jingïathuh jong ki bor pulit ka jylla ki la pyntip ba kitei ki 5 ngut ki nong Bangladesh kiba la shah kem ha ka sngi Saitjaiñ kaba la dep ki kynthup ïa u Rafiqul Islam, Shafiqul Islam, Shahab Ali Sheikh, Mumtaz Aqtar, bad ka Rozina Begum.
Na ka liang ki bor pulit ki la pyntip shuh shuh ba dei hadien ka jingïoh ïa ki jingtip kiba tikna shaphang ka jingdon jong ki nong Bangladesh kiba dang thmu ban kiew da ka rel Humsafar Express, ba ki la leit ban pynlong ïa ki jingkhynra ha ryngkat ka jingwan ïasnohkti lem jong ki bor pahara ka Government Railway Police bad Border Security Force. Dei ha katei ka jingleit khynra ba ki la ïoh ban kem ïa kitei ki 5 ngut kiba la phla ruh ba ki dei ki nongshong shnong jong ka ri Bangladesh.
Na ka jingtohkit jong ki bor pulit, kitei ki nong Bangladesh ki la pyntip ba ki la wan ban rung shapoh u pud u sam jong ka jylla Tripura lyngba ka thaiñ khappud Amtali. Ki la phla ruh ba na ka liang ka jong ki ki la siew da mar T.20,000 sha uwei u briew u ba la tip kyrteng kum u Rafiqul u – u ba la kular ban leit ïalam ïa ki sha ka nongbah Bengaluru. Halor katei ka jingjia, na ka liang ki bor pulit ki la pyntip ba ki la pynrung da ka mokotduma khnang ban pynlong ïa ki jingtohkit kiba dang sah.
Kat kum ka jingïathuh jong ki bor pulit, ki la pyntip ba dang ha ka 16 tarik jong u bnai Jymmang, haduh 5 ngut ki Rohingya ki la shah kem na katei kajuh hi ka jaka sangeh rel hadien ba ki la wan ban rung beaiñ shapoh u pud u sam jong ka jylla Tripura lyngba ka thaiñ khappud. Kitei ki 5 ngut ki la wan ban rung shapoh u pud u sam jong ka jylla Tripura ha ryngkat ka jingthmu ban leit sha Jammu.
