Kohima, Jylliew:
Ki bor sorkar jong ka jylla Nagaland ha ki khyndiat sngi kiba la leit noh ki la pyntip ba ki la don haduh kumba 1,500 ngut ki paid Manipur kiba la wan ban wad jaka rieh tngen ha ki thaiñ bapher bapher jong ka jylla Nagaland.
Kat kum ki jingïoh lum khubor la ïathuh ba ki don napdeng kitei ki paid Manipur kiba la ïoh ïa ki jaka sah na ki bahaïing hasem jong ki; bad don pat kiba la ïoh ïa ki jaka sah na ki paid nongshong shnong jong ka jylla.
Kat kum ka jingïathuh jong u Commissioner ka tnat Kam Pohïing jong ka Sorkar Nagaland – Abhijit Sinha u la pyntip ba na ka liang ka Sorkar Nagaland kam pat shym la ïoh lum satia ïa ka kaiphod kaba janai. Hynrei kat kum ki jinglum jingtip la ïathuh ba ki la don kumba 1,500 ngut ki paid Manipur kiba la wan ban rieh tngen hapoh u pud u sam jong ka jylla Nagaland.
Ki jingïakajia bad jingïaumsnam hapdeng ki paid Kuki bad Meitei kaba la jia ha ka taiew kaba nyngkong jong u bnai Jymmang, ka la wanrah ïa ka jingkhlad jong palat 100 ngut ki briew ha ka jylla Manipur.
Hadien katei ka jingïakajia, la ïathuh ba ki la don palat 10,000 ngut ki shipai Indian Army bad na kiwei kiwei ki tnat shipai ba la pyndonkam ban pahara khnang ban wanrah biang ïa ka shong suk shong saiñ ha ka jylla Manipur.
Kat kum ki jingïoh lum jingtip la ïathuh ba tad haduh kane ka kynti kaba mynta ki la don haduh kumba 37,450 ngut ki paidbah kiba la leit ban shong sah shipor ha ki 272 tylli ki ïing dara ba la pynbiang da ki tnat shipai. Ki jingïakajia ha ka jylla Manipur ki la jia nyngkong eh ha ka 3 tarik jong u bnai Jymmang 2023 hadien ka jingpynlong ïa ka ‘Tribal Solidarity March’ ha ki distrik Rilum ban pyrshah ïa ka jingdawa pynïoh kyrdan Scheduled Tribe (ST) ïa ki paid Meitei.
