Aizawl, Jylliew:
Ki bor sorkar jong ka jylla Mizoram ki la pyntip ba ha ka jingleit khynra droks jong ka tnat Excise & Narcotics jong ka jylla ki la ïoh ban kurup ïa haduh 6 kilo u drok ‘heroin’ ba shongdor palat T.31 klur. Ïa ka jingleit khynra la pynlong ha ki 2 tylli ki jaka kiba don ha ka nongbah Aizawl.
Ki bor sorkar ki la pyntip shuh shuh ba na katei ka jingleit khynra jong ki, ki la ïoh ruh ban kem ïa 5 ngut ki runar – 4 ngut ki nongshong shnong ka jylla Assam bad uwei pat u nongshong shnong ka ri Myanmar.
Kat kum ka kyrwoh la ïathuh ba hadien ka jingïoh ïa ki jingtip kiba bniah, ki bor sorkar ka tnat Excise & Narcotics ha ka sngi Saitjaiñ ki la leit ban pynlong ïa ka jingkhynra ha ka kyntoit Bawngkawn bad ïoh kurup 248 grams u heroin na uwei u runar u ba la tip kyrteng kum u N Ngolang (55 snem ka rta) – nongshong shnong ka thaiñ Tahan, Myanmar.
Ha ka jingkhynra kaba ar, ki bor sorkar ka tnat Excise & Narcotics ki la ïoh ban kurup ïa haduh 5.8 kilogram u heroin na kawei ka trok na ka thaiñ Zemabawk, Aizawl. Ha katei ka jingleit khynra kaba la pynlong ha ka sngi U Blei, ki bor sorkar ki la ïoh ruh ban kem ïa 4 ngut ki runar kiba dei baroh ki nongshong shnong ka thaiñ Cachar district, Assam.
Ki 4 ngut ki nong Assam kiba la shah kem ha katei ka sngi ki kynthup ïa u Mohammad Nazimul Hussain Barbhuiya (34 snem ka rta), u Abdul Kalam Laskar (23 snem ka rta), u Kutbul Alom Laskar (28 snem ka rta) bad u Sukur Ali Mazumder (22 snem ka rta).
Na ka liang ki bor pulit ki la pyntip shuh shuh ba ha ka taiew kaba la dep, ki la ïoh ruh ban kem ïa 2 ngut ki nong Assa bad na kitei ki 2 ngut ki la ïoh ruh ban kurup ïa 3 kilo u droks heroin ba shongdor haduh T.15 klur.
