Guwahati, Jylliew:
U Convenor jong ka Northeast Democratic Alliance (NEDA) u ba dei ruh u Myntri Rangbah jong ka jylla Assam – Himanta Biswa Sarma ha ka 11 tarik mynta u bnai u la leit ban ïakynduh ïa ki nongïalam jong ki seng kieng atiar kiba dei na ka jaitbynriew Kuki bad kiba dang don hapdeng ka soskular sangeh ïasiat bad ka sorkar (suspension of operations). Kat kum ki jingïoh lum khubor la ïathuh ba na ka liang u Himanta Biswa Sarma u la ïoh ban ïakynduh ïa kumba 4 ngut ki nongïalam jong 2 tylli ki seng kieng atiar Kuki ha ka jingïalang kaba la pynlong ha ka nongbah Guwahati ha ka miet jong ka Sngi U Blei ba la dep.
Kat kum ki jingïoh lum khubor la ïathuh ba katei ka jingïalang ka la long kaba seisoh ha kaba ka la don ruh ka jingpynmih ïa ka rai ban shim ïa ki sienjam kiba kyrpang na ka bynta ban wanrah biang ïa ka shong suk shong saiñ ha ka jylla Manipur.
Dang ha ka 10 tarik mynta u bnai, na ka liang u Myntri Rangbah jong ka jylla Assam u la leit ban jngoh ïa ka jylla Manipur bad pynlong ruh ïa ka jingïalang syllok bad u Myntri Rangbah ka Manipur – N Biren Singh ban ïasyllok halor ki sienjam ba donkam na ka bynta ban wanrah biang ïa ka shong suk shong saiñ ha ka jylla Manipur.
Ha katei ka sngi, na ka liang u Myntri Rangbah ka Assam u la pynbna ruh ba kaba donkam kyrkieh ha kane ka kynti kaba mynta ka dei ka shong suk shong saiñ ha ka jylla Manipur.
Kat kum ki jingïoh lum khubor la ïathuh ba na ka liang u Myntri Rangbah jong ka jylla Assam un sa leit ruh ban jngoh ruh ïa ka thaiñ Churachandpur district, Manipur ha ka taiew ka ban sa wan.
Ha katei ka jingleit jngoh jong u ïa ka thaiñ Churachandpur la ïoh jingtip ba na ka liang u convenor jong ka NEDA un sa pynlong ïa ki jingïalang syllok bad ki nongïalam kiba na ka jaitbynriew Kuki.
Kum ban shu ïathuh hangne la ïathuh ba ka jylla Manipur naduh ka 3 tarik jong u bnai Jymmang ka la don hapdeng ki jingïakynat kiba jur hapdeng ki paid Kuki bad ki aid Meitei.
Ha kitei ki jingïakajia la ïathuh ba ki la don ruh haduh kumba 100 ngut eiei ki briew kiba la duh ei ïa laki jong ki jingim bad da ki hajar ngut kiwei pat ki nongshong shnong kiba la hap ban mih jyndat noh na la ki jong ki ïing ki sem ban leit wad jaka rieh sha kiwei kiwei ki jylla jong ka thaiñ shatei lam mihngi jong ka ri.
