France, Jylliew:
Uwei na ki khlur ialehkai phutbol jong ka klob Paris Saint-Germain uba tbit bha ha ka liang thep kol u Kylian Mbappe, u lah pyntip sha ki nongpyn-iaid jong katei ka klob ba un ym shim shuh ia kano kano ka lad la lynti na ka bynta ban iai pynjlan shuh shuh ia ka kontrak ialehkai ka jong u shaduh u snem 2025.
Kumta utei u rangialehkai bar-ri ka France kumba ka paw mynta ka long ka jingiateh kontrak kaba u don mynta kan kut noh ha kaba kut syndon jong ka aiom ialehkai ka ban wan, ha ryngkat bad ka jingdon ruh ka lad na ka bynta ban iai pynjlan shuh shuh ia ka jingiateh sa shisnem tam. Hynrei lada utei u khlur ialehkai jong ka klob um treh ban soi ia ka jingiateh ba thymmai, khlem pep katei ka kynhun ialehkai kan sa duh noh ruh ia u ha ki por jong kata ka snem ban sa wan khlem da iohnong eiei. Kumta katei ka kynhun kan hap ban pynkhreh mynta na ka bynta ban die noh ia u ha ka iew ka ban wan ban ia kaba ka shu duhnoh syndet ia u khlem da iohnong eiei. Ka jingpynmih khubor mynta da u Mbappe ka lah wan rah ruh ia ka jingeh kaba khraw ia ka klob baroh kawei hadien ba ka lah dep ban duh shuwa ia u khlur ialehkai jong ka u Lionel Messi uba lah leit ban ialehkai sha ka klob Inter Miami jong ka Major League Soccer(MLS). Kumta ha kaba iadei bad katei ka bynta, na ka liang jong ka klob ka lah ai por ia u Mbappe haduh ka 31 tarik u Naitung 2023 na ka bynta ba un shim ia ka rai ba khatduh.
Ha ka tei ka jngpynbna ka jong u, ka klob Real Madrid mynta ka paw kum ka kynhun ialehkai kaba biang eh na ka bynta jong u ban leit pyniasoh hadien ba u lah dep ban kyntait teng ha ka ban leit pyniasoh bad ka da kaba pynkyndit ia ka kynhun baroh kawei da kaba pynjlan ia ka jingiateh kontrak bad katei ka klob ialehkai kaba u don mynta. Ka jingkhreh u Mbappe ban mihnoh na ka klob PSG ha kaba kut syndon jong ka kontrak kaba u iateh mynta kata ha u snem 2024, kan wanrah ia ka jingeh kaba khraw ia ka klob baroh kawei.
Kumta ban kiar na ka jingmih noh ki rangialehkai ba pawkhmat jong ka, katei ka kynhun ialehkai kan sa ialeh ruh ban theh pisa da ki millions bad ka ban kamai arshah na ka iew iadie-iathied ka ban wan. Kumba ka paw hi ka long ba u Mbappe ua lah pyniasoh bad katei ka klob da ka jingiateh kaba jlan ha ka aiom ialehkai hadien ka jingmih noh na ka klob Monaco ha u Nailar 2017 bad kaba lah kylla pat sha ka jingiateh kaba skhem bad ka klob baroh kawei ha ka dor kaba lah kot sha ka 180 million euros ($194 million).
