Shillong, Jylliew 13:
Ka Jylla ka la ïoh ban khur ïa kawei ka takma ksiar ha ka National School Games (NSG) hadien ba ka kynhun jong ki rangïalehkai phutbol U-19 ka la rah ïa ka nam lahduh.
Kane ka nam jop ka la wan hadien ba ka lah ban pynliem noh ïa ka Punjab da 1-0 kol ha ka jingïakhun final kaba long ha ka Sngi Ba-ar ha Bhopal, Madhya Pradesh.
Ha lyndet jong kane ka jingjop ka la wan urlong lyngba u rangïalehkai shakhmat u Fashioning Syngkli uba la ïoh ban thep kol da ka khlieh.
Haba phai sha ka jingïakhun, la ong naduh kaba sdang baroh ar kynhun ki la pyrshang ban ïalehkai bha da kaba ïoh katto katne ki kabu kiba biang, hynrei kim shym la lah ban thep kol haduh kaba kut jong ka kylla step.
Hadien katto katne por ba la bteng biang ïa ka jingïakhun jong ka kylla miet, ka Meghalaya ka la ïoh ban pynkhih jar nyngkong eh lyngba u Fashioning. Une u rangïalehkai u la ïoh ban pyndei da ka khlieh ha kaba u rangapkol ka Punjab um shym la lah ban kyrda ha ka minit kaba 45.
Kane ka jinglah ban thep ka la pynlong ïa ki rangïalehkai ka Jylla hapoh ka jingïalam u Bah Jeffrey Warlarpih (coach) ban ym ailad ïa ka liang pyrshah bad ha kaba kut ka la khur syndon ïa ka jingjop. U Colinsalmon Lyngdoh u la khur ia ka nam Best Player ha kane ka lympung.
Kham hashwa jong ka jingïakhun semi final kaba long hynne ka sngi, ka Meghalaya ka la pynliem ïa ka Kerala da 1-0 kol.
Haba phai sha ka jingïakhun semi final jong ki kynthei, ka Meghalaya ka la shah rem noh ha ka Bihar da 1-0 kol na ka bynta ban khur ïa ka takma rnong.
Tat haduh kaba kut jong kane ka lympung ïalehkai, ka Jylla ka la khur kawei ka takma ksiar lem bad ka takma rnong lyngba ka nongïalehkai High Jump ka Rinalis Ingti, kaba la lah ban kynthih haduh 1.55m.
