New Delhi, Jylliew:
Katkum ki khubor la ong ba uwei u dohkha ‘Shark’ u la shah pyniap ha kawei ka kynhun jong ki nongleit kai sha ka rud duriaw ‘Beach’ ha Egypt hadien ba la suba ba utei u dohkha u la nguid im ia uwei u nongjngoh kai pyrthei na Russia.
U Vladimir Popov u la shah bam im ha utei u dohkha markhmat kaba kitei kiwei pat kiba ialeit kai sha katei ka rud duriaw ki dang ia jngi ha katei ka duriaw Red Sea kaba don hapoh jong ka nongbah Hurghada ha ka Sngi Palei. Katkum ka video ba la saphriang paidbah la iohi ia utei u nong Russia ha ka por ba u shah tan bad shah ktha im ha utei u dohkha katba u dang iakhun ban jngi bad lait phet na ka shyntur jong utei u dohkha heh ha katei ka sngi ha ryngkat ka jingpyrta ban khot iarap na kito kiba iadon lang ha katei ka jaka ha katei ka por. La iathuh ruh ba utei u dohkha u la ktha bad pynmynsaw kai shuwa ia utei u briew kumba 2 kynta eiei, hashwa ba un tan noh syndon ia u shapoh um.
Kumta, ha katei hi ka sngi la ioh jingtip pat ba ki nongleit sha katei ka rud duriaw ha Egypt ki la leit da ki liengrit jongki ha katei ka sngi bad ki la pynngat ia utei u dohkha ha ka jar ba ki la rah khnang ban ioh kem bad ki la tied pyniap syndon ia utei u dohkha ia uba ki ngeit skhem ba dei tang utei hi u dohkha uba nguid ia utei u nong Russia.
Ha kawei ka video ba la saphriang paidbah hadien katto- katne por, la iohi ia kitei ki briew ba ki la sei ia utei u dohkha sha ryngkew bad uwei napdeng jongki pat uba dang bat ia u nar bad uba dang ialeh ban tied pyniap ia utei u dohkha na ki bynta jong ka khlieh bad don pat na ki kiba dang pyrshang ban pied ia ka shyntur jong utei u dohkha.
Ha kajuh ka por, ka tnat mariang jong ka Egypt ka la pyntikna ba ia utei u dohkha la ioh ban shimti noh da ka tnat mariang bad ba kin dang peit thuh bad wad bniah bha hapoh ka jaka pule bniah. Ki briew jong katei ka jaka pule bniah ‘Laboratory’ kin wad bniah shuh shuh ruh la utei u dohkha u don bynta ne em ha kiwei pat kiba kum kitei ki jingjia ha ki por ba la leit.
Ki bor pyniaid jong katei ka rud duriaw ki la pynbna ba la khang noh shwa shipor ia ki paidbah bad ki nongtong doh ba kin leit sha katei ka duriaw tad haduh ba kin da ioh da kawei pat ka jingpynbna na ki bor pyniaid.
