Bertina Lyngdoh
Phi lah ban long u barit na ki barit,
Uba tlot na ki ba tlot;
Uba sniew ha ka dur na kiba bun,
Bad uba jar-jar na ki ba jar-jar.
Kine baroh kin pher lei, lada ka mynsiem ka long uta u tiewpathai khubor ia ka Ri bad ka jaitbynriew baroh kawei. Mynno-mynno te phim ju kren, ka imlang sahlang ka i tang ki jingtlot, ki tip ruh bad i ia phi kum uba duk, ne uba kit ram. Kine ki dei tang ki jingiohi ka pyrthei, hynrei ia kaba sah pat, dei ka por bad ka jingtrei shitom ban batai. Dalade ruh, phin sngew ba phim long eiei hynrei haba ka mynsiem ka tied bad haba la kha ia phi ban long kumta, lah mo ban shu sngap? Dei namar kane, ka pyrthei kan tip ia phi kum uta u Tiewpathai Khubor.
Kum ki khun ka bri u hynniewtrep, ngi dang donkam ia shibun ki briew ki ban long kita u Tiewpathai Khubor ia ka ri bad ka jait bynriew. Kine, ki dei kita, kiba iakhih iasaid na ka bynta ia ka bha ka miat, ka suk ka sain, ka hok ka nongkynti, bad ka jingiaryng-katlang ne ka jingmyntoi jong u paid ba bun balang. Ha ka ri Khasi Pnar jong ngi, ngi la don kham bun kita kiba la kham iar bha ha ka jingnang jingstad ne ka jingmut jingpyrkhat, hynrei katkum ka jinglong jingman ka por mynta, i kumba ki buh tang halade ym pat ia ka lawei ka bri u hynniewtrep. Kaba shisha bad kumba ki ju ong, ba ka bor ka pisa ka lah ban pynsngap jar ia kiei kiei baroh hynrei dang don pat ia kaba ka pisa kam lah bor iaki. Kane ka pyni ba ka jingiabha lang ha ka imlang sahlang ka kor ha ka mynsiem jong u. Namar ka jingieit jong u bad ka jingpyrkhat janai ia ka lawei ki khun ka ri, u iengskhem ha la ka nongrim, ban ratdiengkhong ia kaba ula sakhi ia ka jingsniew ka ban lap ia ki khun ka lawei ka ri. Ban biang baroh lang, um salia ban shim da ki lad ki synjam iakhih ban kiar na ki jingeh ba ki khun khasi pnar kin mad. Ka jingiakhih jong u kam dei kata ka jing-iakhih kaba khlem nongrim, hynrei ka ban pynkyndit bad pynpyrkhat ia ka jingeh kaba ap ia ngi. Namar ka jingkwah ban pynshisha ba ka jaitbynriew kam dei ban jah klep, ne shah lehbein ban bein ha kiwei, ne wat ha ki para jaitbynriew ruh, um salia ban lenlade da kaba shah thngan shah shitom, kiba laiphewjait ne wat ban duh noh la ka jingim hakhmat u paid ba bun balang. Ka jing-long u tiewpathai khubor kam da dei eh tang ha u rangbah briew, hynrei ka lah ruh ban dei na ki kynthei briew wat la ki dei kita kiba shibuit shibor.
Kumta uba leh ia kano kano ka kam ba bha ka kam pynsahnam ia ka ri bad ka jaitbynriew tat haduh ka jing-iap noh ka jong u, u ioh ia ka kyrteng bad ka nam U Tiewpathai Khubor. Ki kam ba bha kin iai sah kynmaw, kan im ka kyrteng jong u, ha ki khun ka pateng ka ri. To ngin kyrmen ba ngin dang don shuh ia kum kine ki briew ia ka bha ka miat ki pateng ban wan. Ieng joit ko khun ka Ri, namar ka pateng ka lawei ban bud. Wat tieng wat rieh la ka hok ka bha ka miat baroh lang ba nam jong phi yn iai pyrto junom.
