Aizawl, Jylliew:
Ki bor pulit jong ka jylla Mizoram ha ka jingpyllait kyrwoh ha ka 11 tarik mynta u bnai ki la pyntip ba uwei u rangbah ïa u ba la suba ba u dei u nongshong shnong ka jylla Andhra Pradesh u la dkhat jubor ïa la ka jong ka jingim ha ka ïing sah wai ka jong u kaba don ha ka nongbah Aizawl. Ki bor pulit ka jylla ki la pyntip ba tad haduh kane ka kynti kaba mynta, kim pat shym la don satia ki bahaïing hasem na ki paralok parajor kiba la wan shimti ïa katei ka metïap.
Kat kum kyrwoh la ïathuh ba utei u rangbah u ba la tip kyrteng kum u Jones Cedric Goeffrey (62 snem ka rta) u la donkti ban siat ïap ïalade ha kawei ka ïing sah wai kaba don ha ka kyntoit Falkland, Aizawl ha ka 9 tarik mynta u bnai.
Kat kum ka jingtohkit jong ki bor pulit ki la pyntip ba na ka jingkhmih bniah ïa ki kot ki sla ba donkam jong utei u rangbah la shem ba u dei u nongshong shnong jong ka nongbah Vishakapatnam kaba don ha ka jylla Andhra Pradesh.
Na ka liang ki bor pulit ki la pyntip shuh shuh ba kat kum na ki kot ki sla la shem ruh ba ka jaka sah ba shipor jong utei u rangbah ka dei ha ka thaiñ Sunkadakatte, Bengaluru, Karnataka.
Ki la pyntip ba tad haduh kane ka kynti kaba mynta, kam pat shym la don kano kano ka jingseisoh ban lap ïa ki bahaïing hasem jong utei u rangbah. Ki bor pulit ki la pyntip shuh shuh ba ïa ka metïap jong utei u rangbah la buh ha ka jaka buh metïap jong ka Aizawl Civil Hospital.
Halor katei ka jingjia, na ka liang ki bor pulit jong ka jylla ki la kyntu ïa ki riew paidbah ba lada ki don ïa kino kino ki jingtip shaphang ki bahaïing hasem jong ueti u rangbah kin lah ban phone sha u number 0389-2340758 lane ha u 87947 47292.
