Shillong, Jylliew 13:
Ka Khliehmawlieh Youth Club bad ka Rangdajied United FC ki la jam sha ka final ha ka Meghalaya State League 2023 hadien ba khur jingjop ha ka Sngi Ba-ar.
Ha ka jingïakhun semi final wat ba ar kaba la long ha ka nongbah Shillong, ka Khliehmawlieh ka la pynshaïong hi ngaiñ ïa ka lahduh jong ka Shillong Premier League, ka Mawlai SC hadien ba ka lah ban pynliem da 3-1 kol bad ban tam da 3-2 lyngba ka aggregate ha SSA Stadium.
Wat la ka Khliehmawlieh ka la shah rem ha ka Mawlai ha ka wat ba nyngkong ha la ïing (Tura) da 1-0 kol, hynrei kane ka kynhun ïalehkai Super Division na West Khasi ka la wanphai da ka jingkhlaiñ bor.
Ha kane ka jingïakhun ka Mawlai ha kaba sdang ka la pyrshang ban ïakhun tyngeh. Wat la kane ka kynhun hapoh ka jingïalam u Khlaiñ Pyrkhat Syiemlieh ka la duh ei ïa ar tylli ki kabu ksiar, hynrei hadien shiteng kynta ka la lah ban pynurlong na ka bynta ban ïoh pynkhih jar nyngkong lyngba u Donlad Diengdoh ha ka minit kaba 33. Kane ka la wan hadien ka jingïarap pynbuh bol da u Nikelson Bina bad utei u rangïalehkai um shym la pynlehnohei ïa kane ka kabu ksiar.
Ka jingbym lah ban shan skhem ki rangïalehkai ha ka bynta kaba shadien ka la pynlong ïa ka Mawlai ban shah pynphai kylla hashwa ban kut ka jingïalehkai jong ka kylla step lyngba u Mainingstar Marngar (45’+1).
Ka Mawlai ka la ïoh biang ïa ka kabu kaba biang lyngba u Nikelson, hynrei kane ka jingpyrshang shut bol ka jong u ka la leit dei na diengkol.
Ka Khliehmawlieh ka la ïoh ban pynbud biang ïa ka kol kaba ar lyngba u Livingstone Nongrang, uba la ïoh ban shut na kyndong bad ka la leit rung beit beit hapoh kol na ka bynta ban tam da 2-1 kol. Kane ka jingwanphai ka Khliehmawlieh da ka jingkhlaiñ bor ha kane ka wat ba ar ka dei lyngba ka jinglah ban ïalehkai bha ki rangïalehkai ha ka bynta kaba shapdeng.
Hadien katto katne por ka Mawlai ka la ïoh da ka penalty na ka daw ba uwei na ki rangïalehkai ka Khliehmawlieh u la kum pynur hapoh ‘box’ ïa u rangïalehkai ka Mawlai. Dei hangne ba u coach ka Khliehmawlieh u la shah sei syndon da ka red card na ka daw ba u la pynpaw ïa ka jingpyrshah halor katei ka penalty bad ruh ban ktah kti ïa ki rephri. Pynban dei hangne ba u kapten ka Mawlai u Brolington Warlarpih, um shym la pynlehnohei ïa kane ka kabu ksiar kaba u la ïoh ban shut ïa ka penalty ha ka minit kaba 87 na ka bynta ban ïakhaid mar 2-2 kol.
Wat la kine ki kynhun ki la pyrshang ban ïakhun tyngeh, hynrei shwa ban wai artad ka Khliehmawlieh ka la lah ban pynurlong ban thep biang sa shi kol lyngba u Livingstone lyngba ka jingpynbuh bol u Kyntiew Myrthong (90′). U rangapkol ka Mawlai ha kane ka por um shym la lah ban khanglad na kane ka jingshah thep bad ban pynlong ïa ka Khliehmawlieh ban khur syndon ïa ka jingjop.
Haba phai sha kawei pat ka semi final wat ba-ar ha madan MDSA kaba ha Mawkyrwat, ka lahduh jong ka SPL 2019 ka Shillong Lajong FC ka la shah rem noh ha ka Rangdajied da 3-0 kol na ka bynta ban tam da 4-3 lyngba ka aggregate.
U Tremiki Lamurong (32′ & 73′) u la ïoh ban thep ar kol bad ïa kawei pat la pynbud da u Batskhem Thangkhiew (56′) na ka bynta ban khur syndon ïa ka nam jop.
Lyngba kine ki nam jop, ka Khliehmawlieh kan pynkhreh ban ïakhun final pyrshah ïa ka Rangdajied na ka bynta ban ïaknieh ïa ka nam lahduh ha ka Sngi Saitjaiñ ha SSA Stadium.
