Chennai, Jylliew:
Ka kynhun ialehkai Squash ka ri ka lah sdang ia ka jingiaid lynti jong ka ha ka lympung ialehkai ba mynta ka Squash World Cup 2023 da ka jingiakynduh nyngkongeh shuwa bad ka Hong Kong bad ha kata ka jingiakhun, ka kynhun ialehkai ka ri ka lah khur ia ka jingjoop ba nyngkong da 4-0 ha ka jingialehkai na Pool B.
Kumta ha ka kynhun ialehkai ka ri ka kynthup ia ki katto katne ki nongialehkai ba paw kata ka Joshna Chinappa, Saurav Ghosal, Tanvi Khanna bad Abhay Singh ha kaba baroh saw ngut ki nongialehkai ka ri ki lah khur ia ka jingjop jong ki pyrshah ia ki nongialehkai na Hong Kong. Shuh shuh ruh ha ka jinglah jong kitei ki nongialehkai ban khur ia ka jingjop, ka long ba u Abhay Singh u lah pynliem noh ia u Chung Yat Long da 7-2, 7-3, 7-6; Joshna Chinappa kaba lah iakynduh bad ka Ching Hei Fung bad pynliem noh ia ka da 7-1, 7-5, 7-5, u Saurav Ghosal bad u Andes Ling bad uba la lah ban pynliem ia u da 5-7, 7-2, 7-5, 7-1, ka Tanvi Khanna pat ia ka Toby Tse da 5-7, 6-7, 7-1, 7-4, 7-3.
Kumba ka long mynta, katei ka lympung ialehkai ka lah nang iaid shakhmat, ha kaba ka long ruh ka bynta ba saw jong ka Team Championship ha ka jingioh ka lympung ban wanphai biang sha ka prokram ialehkai Squash Shabar-ri hadien 12 snem bad ba katei ka lympung ialehkai ba mynta kan iai pyntyllun ia ki jingialehkai haduh ka 17 tarik jong u bnai ba mynta.
Ka khubor ka iathuh ruh ba ka Pool ha kaba ka India ka shah buh mynta ka kynthup ia ka jingdon ka kynhun ialehkai na Australia, Colombia, Egypt, Hong Kong China, Japan, Malaysia and South Africa.<
Katba ka Pool A ha ka lympung ka kynthup ia ka kynhun ialehkai na Egypt, Australia, Malaysia bad Colombia. Ka Squash World Cup 2023 la pynlong mynta ia ka ha ki ar bynta kata ka rynsan ba nyngkong jong ka jingiakhun group bad kaba ar ka rynsan iakhun Knockout/Classification.
Na ka bynta ka rynsan Group, ia ki kynhun ialehkai lah phiah ha ki ar pool na ka bynta ki saw kynhun ialehkai.
Shuh shuh ka khubor ka iathuh ba ka India kam pat ju lah ban khur ia ka trophy jingjop na katei ka lympung ialehkai World Cup wat hadien ba ka Australia ka lah rah ia ka trophy jingjop ha kaba sdangduh jong katei ka lympung ialehkai kata ha u snem 1996 katba ka England ka paw kum ka lahduh ha ka bynta ba-ar jong katei ka lympung ialehkai kata ha u snem 1999.
