Nairobi, Jylliew:
Kawei na ki nongiakob Mareh ha ka ‘Distance Runner’ ka Faith Kipyegon na ka ri Kenya ka lah ioh pdiang mynta ia ka song pisa kaba haduh $35,000 bad kawei ka iing paki-dulan na u nongpyniaid bahakhliehduh jong ka ri jong ka u William Ruto kum ki khusnam halor ka jinglah katei ka nongialehkai ban pynprah ia ar tylli ki rekod ha ka pyrthei ha ka shi taiew ialehkai ha ka jingshim bynta ha ka Paris Diamond League.
Ka khubor ka iathuh ba ka Kipyegon kaba lah leit ban iakynduh ia utei u nongialam ka ri ha ka shlem treikam ka jong u, ka iathuh ba kan sa pynurlong ia ka jingkular ka jong ka hakhmat u kpa na ka bynta ban pynthied ia u da ka kali ba thymmai.
Kumta ruh katei ka nongialehkai ba 29 snem kaba long ruh ka lahduh arsien ha ka Olympic na ka jingiakob mareh ha ka 1,500m, ka lah thaw mynta ia ka rekod ba thymmai na katei ka lympung ialehkai ha ka 15,00m ha Florence, Italy ha ka 2 tarik u Jylliew ha ka por ba ka lah ruh ban pynpra noh ia ka rekod ba phra snem kynthih ba lah thaw da ka Genzebe Dibaba na Ethiopia.
Ka Kipyegon ka kylla long ruh ka thei ialehkai ba nyngkong ban iaid hapoh ka 3min:50 sekhon ha ryngkat bad ka 3:49.11. ka long ruh ka nongialehkai kaba lah pynkhein ia ka rekod ha ka 5,000m ha ka taiew ba lah dep ha ka tei ka lympung ialehkai ba mynta da kaba pyndep ia ka jingiakhun ha ka por 14:05.20 bad jop ruh ia kata ka jingiakhun da kaba tam noh shakhmat ia ka nongbat rekod barim ha ka pyrthei kaba na ka ri Ethopia ka Letesenbet Gidey.
