Jowai, Jylliew 14:
Ka Sohmynting Dongnein, Khliehmyntdu Neinchnong Mihmyntdu bad ka Lumkhangdong Kyndong Tuber ki la khur ïa ka jingjop ha ka lympung ïalehkai Third Division Football Tournament (3rd Adelbert Memorial Trophy) ba la pynïaid da ka West Jaiñtia District Sports Association (WJDSA) ha ka sngi Balang ha Kiang Nangbah Stadium kaba ha Jowai.
Ha ka jingïakhun kaba nyngkong, ka Sohmynting Dongnein ka la pynliem ïa ka Umshangiar lyngba ka shi kol ba la thep da u Wanmi Kyndait ha ka minit kaba 46.
Ha ka jingïakhun kaba bud, ka Khliehmyntdu Neinchnong Mihmyntdu ka la pynliem ïa ka Pateinki Sabah da 2-1 kol. Wat la ka Pateinki Sabah ka la pynkhih jar nyngkong eh lyngba u Prayme Kyndait ha ka minit kaba 11, hynrei ka Khliehmyntdu ka la lah ban pynphai kylla ar kol lyngba u Arkini Chyrmang ha ka minit kaba 21 bad u Bandaia i Ryngki ha ka minit kaba 54 na ka bynta ban khur syndon ïa ka jingjop.
Ha ka jingïakhun kaba khatduh ka Lumkhangdong Kyndong Tuber ka la pynliem noh ïa ka Nangbah Mooknor da 3-2 kol. Ïa ki kol jong ka Lumkhangdong Kyndong Tuber la thep ar kol da u Damepaia Shylla ha ka minit kaba 5 & 37, bad ia kawei pat la pynbud da u Fourki Chyrmang ha ka minit kaba 28. Ïa ki artylli ki kol jong ka Nangbah Mooknor la thep da u Pynshngaiñ Hinge ha ka minit kaba 40 bad u Poimidanial Thubru ha ka minit kaba 54.
Ka jingïalehkai ha ka sngi Palei kan long hapdeng ka Lutituber Ïalong pyrshah ïa ka Youth Social Walfare Pynthor ha ka por 12.30 mynsngi, ka Mulang Ïalong pyrshah ïa ka Madan Thadmuthlong ha ka por 2 baje bad ka Lumpyrtuh Mihmyntdu ïa ka Royal Pole Mihmyntdu ha ka por 3.30 baje janmiet.
