London, Jylliew:
Ha ka thup kyrdan ba thymmai ba la pyllait paidbah da ka International Cricket Council (ICC) haba iadei bad ki kyrdan jong ki nongialehkai kriket ha ka jingialehkai Test, ka khubor ka iathuh ba u Ajinkya Rahane u lah kiew mynta sha ka jaka ba 37, katba u Shardul Thakur u la kiew sha ka jaka ba 94 ha ka liang ki nontied.
Nalor kata, la iathuh ruh ha katei ka thup kyrdan ba thymmai, u Ravichandran Ashwin u dang iai sah biang ha ka kyrdan ba nyngkong ha ka liang ki nongkawang bol, wat la um shym la ioh ban shim bynta ha ka phainal jong ka World Test Championship.
Ha kawei pat ka bynta jong ka jingkynjoh kaba khampher ha ka kyrdan, la shem ba u nongtied jong ka kynhun ialehkai na Australia u lah ioh ban rung ha ka thup balai ha kaba u Steve Smith bad u Travis Head ki lah ioh ha ka ban pyniasohlang ialade bad u Marnus Labuschagne hadien ka jinglah jong ki ban kamai ia ki spah ron ha katei ka lympung ialehkai pyrshah ia ka India ha Oval. Wat la ka India ka lah mad ia ka jingshah rem noh da 209 ron ha ka jingialehkai, u Rahane pat u la lah ban kamai ia ki 89 bad 46 kiba lah iarap ia u mynta ban wanphaibiang sha katei ka kyrdan katba u Shardul uba lah kamai ia ki 50 ron ha ka innings ialehkai kaba nyngkong, u lah kiew mynta da hynriew jaka.
Shuh shuh ruh u nongapwiket bad ha kajuh ka por kum u nongtied ba paw ka India u Rishabh Pant, u iaisah ha ka kyrdan ba hajrong kata ha kaba 10 katba u kapten jong ka kynhun u Rohit Sharma bad Virat Kohli ki iaisah ha kajuh ka jaka kata ha ka kyrdan ba 12 bad 13.
Kumjuh ruh u rangkawang bol spin ka kynhun u Ashwin u iai bteng ha ka kyrdan ba nyngkong ha ka thup kawang bol jong ka jingialehkai Test, katba u Ravindra Jadeja u iaisah ha ka kyrdan ba 9 kaba u bat baroh shi katta.
Kumta ruh u Jasprit Bumrah uba lah iakhun Test khatduh ha u Naitung 2022, u lah shah pynhiar mynta da ar jaka sha ka kyrdan ba 8. Ha kaba iadei bad ki rangialehkai ka Australia, u Labuschagne u iai bteng u iai bat ha ka kyrdan ba nyngkong da 903 rating point katba u Smith u lah jam mynta da shi jaka sha ka kyrdan ba 2 hadien ba u lah kamai ia ki121 bad 34 ron.
Uwei pat u nongkawang spah ron ha ka jingiakhun phainal ha ka WTC u Head kata da 163 bad 18 ki lah kyntiew ia u da lai jaka sha ka kyrdan ba biang tam eh kata sha kaba 3.
U nongap wiket ka Australia u Alex Carey u lah jam mynta da khat-wei jaka sha ka kyrdan ba 36 hadien u la lah ban kamai 48 bad 66 ron khlem shah pynrem katba u Nathan Lyon da ar jaka sha ka kyrdan ba 6 bad u Scott Boland da san jaka sha ka kyrdan ba 36 hadien ba ki lah pyndep da 5 wiket ha man la ki jing-ialehkai.
