C. B. Iawphniaw
Wat nym niew ba biej ia ki nongialam kiba la saindur ia ka Jylla naduh ba la phiah na ka Assam? Ka jingniew biej bad kynnoh leh bakla ia ki nongialam kiba long ki nongthaw ain naduh u snem 1972 hadien ba la ioh ia ka Jylla la jong ka Meghalaya ka bym sngew iahap. Ki nongialam ha kato ka por ki dei na ka seng APHLC kaba bat ia ka sorkar kiba la saindur ia kane ka bhah thungkam thungjam kaba dang neh haduh mynta hapdeng ki Khasi – Jaintia bad Garo.
Kane ka bhah thungkam thungjam ne kata ka Reservation ka long kum u shabi kaba plie lad ia ngi ki Khasi – Jaintia bad Garo ban ioh bhah kham bun ha ki kam ki jam hapoh ka Jylla. Ki nongthaw ain ha kato ka por ki la rai ban iasam ia ngi ki Khasi – Jaintia 40 p.c. bad ia ki Garo 40 p.c. bad ka la long ka jingmyntoi kaba khraw bad kam dei ka jingleh bakla ki nongthaw ain ha kato ka por.
Te ka shong pat ha kine ki nongthaw ain kiba mynta la ki dang kwah ban pynneh ia kajuh ne kin iai peit biang (review) bad pynthymmai noh ia kane ka Reservation policy kaba la palat 50 snem kaba la ai bhah naduh u snem 1972.
Ka shong mynta ha ka jingiasngewthuh lang hapdeng ki Khasi – Jaintia bad Garo, kumno ban pynbeit ia kane ka Reservation Policy kaba la lah shiliang katkum ka jingbun briew. Hynrei dei ban shim ka jingsngew jong baroh na kine ki trai muluk ki trai Jylla, khlem da pynmong iano iano ruh. Lehse kane ka long kaba biang eh ban iai peit biang ne pynbeit thymmai ia ka Reservation policy, khnang ba ngin ym duh nong haba phiah ne pynkylla ia kane ka bhah thungkam thungjam kumba ka long mynta.
Kane ka long ka jingiohi jongngi ki riew paidbah haba ia dei bad kane ka policy thungkam thungjam hapoh ka Jylla.
