Ka Meghalaya Energy Corporation Limited (MeECL) ka ïakynduh mawsiang na ka por sha ka por na ka daw jong ka jingkyrduh pisa. Tangba kumno hi kam kyrduh haba ka dang dei ban ïoh sa kumba T. 300 klur na ki paidbah bad ki karkhana kiba pyndonkam bording? Kane ka dei kawei na ki jingdkoh ha ka jingtreikam jong ka MeECL ba kam lah ban lum ïa ka bai thang bording ha ka por kaba biang. Na ka snem sha ka snem, ka pisa ka la lang khamtam na ki jaka nongkyndong. Ki don ki jingud jingnam ba ki ‘Bill’ jong ka bai pyndonkam bording ki sahkut ha ki dukan sha bad kim ju poi sha ki ïing jong ki nongshong shnong. Ki don ki jingud jingnam ba ki ‘Bill’ ki poi shisien lano, bad ynda la peit, ka bai thang bording ka la poi sha ki phew hajar. Naei ki baduk basuk kin ïoh pisa ban siew shisien siew? Ka MeECL ka la dei ban pyrkhat bha kumno ban lum ha ka rukom kaba janai ïa ka pisa kaba ka dei hok ban ïoh na baroh la ki long ki ’riew paidbah ne ki karkhana ne ki shlem treikam jong ka sorkar.
U Managing Director ka MeECL, u Sanjay Goyal, u la ïathuh ba lada kheiñlang lut ïa ka pisa kaba dang dei ban ïoh lum ïa ka bai thang ilektrik na ki paidbah bad na ki karkhana kumjuh ruh na kito kiba leit ïakhun mukotduma kynthup ka jingpynsngew sha ka Central Electricity Regulatory Commission (CERC), ka pisa kaba dang dei ban ïoh ka MeECL ka la kot sha ka T.300 klur. U Goyal u la ong ba ka bynta kaba kham hakhmat eh haba ïadei bad ki karkhana nalor ka pisa kaba dang dei ban ïohlum, ka dei ka jingkheiñ dor ïa ka bai pyndonkam ilektrik namar ka dor kaba buh da ka State Electricity Regulatory Commission (SERC) ka dei kaba kham rit. Kumta u la ïathuh ba na ka liang ka MeECL ka la phah ka jingpynsngew (petition) sha ka SERC bad ka shong ha ka Commission ban khmih bniah bad buh dor.
Ki karkhana ki dei kiwei na kiba leh sahuh bad kim ju kheiñ. Nalor kine ki don sa ki shlem treikam jong ka sorkar ki bym ju siew da ki snem. Haba ngi peit ïa kine kiei-kiei, ngi la sngewdei ban kyntu ïa ka MeECL ba kan shu ot beit noh ïa ka bording khamtam na ki karkhana bad ki shlem treikam jong ka sorkar bad ban sa ai bording biang ynda ki la dep siew lut ïa ka pisa. Kam long shuh ban shu shah jem than. Ngi ïohi ba ki shlem pynmih bad sam bording sha kiwei ki jylla kim ju salia bad ki ot beit ïa ka bording na ki ïing ki sem ne karkhana ne shlem treikam jong ka sorkar lada kim lah siew ha ka por kaba la buh. Hangne ha Meghalaya, ngi la shu bha mynsiem shaba palat. La shu ailad lut ïa baroh ban leh katba mon. Ynda la kyrduh bording, sa ïa ka khñium pat ïa ka MeECL. Naei kan thied bording lada kam don pisa? Kumno kan ym don pisa lada ym wan siew ha ka por kaba biang? Ka MeECL ka hap ban shaniah ha ngi ki paidbah bad ma ngi, ngin hap shaniah ha ka MeECL ban ïoh bording namar lait na kane, ngim don da kawei pat ka shlem pynmih bad sam bording ha jylla. Lada ka im ka MeECL, ma ngi ruh ngi im. Lada ma ngi ki paidbah ngim kyrshan, ka MeECL ruh kan khyllem bad hangta ngin sa sngewthuh ïa ka jingduhnong.
Kham mynshwa ngi la ai jingmut ïa ka MeECL lyngba kane ka rynsan ba kan pyndonkam da ki trai shnong ha baroh ki shnong kiba don palat 6,000 tylli na ka bynta ban sam ïa ki ‘Bill’ bad ban shim ruh ïa ka pisa. Kan dei ka kamram jong kine ki trai shnong ba kin leit ai ïa ka pisa sha ka shlem treikam ka MeECL. Ka MeECL ka lah ban siew da ka kynja ‘commission’ ïa kiba sam ‘Bill’ bad lum pisa bad ban siew ruh ïa ka bai leit bai wan. Lada buh tang uwei ne arngut ki briew ha kawei ka shnong, ngi ngeit ba ka MeECL kan ym hap ban ap da ki snem ba kan ïoh ïa ka pisa kaba ka dei hok. Lada ka leh sting ban lum, ki nongsiew ruh kin leh sting. Lada ka MeECL kam ïoh pisa biang por, kan hap ban shu shaniah beit ha ki ram ba ka shim na ka por sha ka por. Bad ka ram kan nang lang bad ka sut kan nang kiew. Shisien ka sngi, ka MeECL ka lah ban poi haduh u pud ba kan ym lah shuh ban siew wat tang ïa ka sut, ynnai pat ïakren ïa ka trai. Haba kut, kane ka shlem ka lah ban kylla long kum ka Meghalaya Transport Corporation lane ka Mawmluh Cherra Cements Limited. Lada jia kumta, shaei ngin poi kum ka jylla?
Namarkata, ngi kyntu ïa baroh ki nongshong shnong ba kin ïa shimkhia ban siew ïa ka bai thang bording. Ka MeECL ruh ka dei ban pynduna ïa ki jingleh bakla da kaba ai da ki ‘Bill’ kiba ka jingsiew ka heh khlem da peit bha ha kano ka rukom ki briew ki la pyndonkam bording. Ka jingthurmur ka MeECL ka buh jingartatien ha ki paidbah. Haba ka MeECL ka la dei kata ka ‘Corporation’, ka dei ruh ban trei kum ka ‘Corporation’ bad ym kum ka tnat treikam jong ka sorkar. Tangba ngi la thait ban kren ïa kane namar la bun snem ngi la ïathir bad ïa ai jingmut tangba kam ju poi shano-shano. Ïa mynta, ngin hap ban shu ïa ap ïa u ‘lap bah ‘lap san ba un pyndap noh ïa ka Umïam bad ïa ka Myntdu Leshka khnang ba ngin lait noh na kane ka jingshah pynlip bording kaba da ki kynta ha ka shi sngi.
