Imphal, Jylliew:
Ki bor sorkar jong ka jylla Manipur ha kane ka taiew kaba mynta ki la pyntip ba ki bor pahara jong ka jylla tad haduh kane ka kynti kaba mynta ki la ïoh biang ïa palat 1,000 tylli ki tiar siat kiba la shah rong tuh ha ki kynhun runar naduh ba la mih ki jingïakajia bad jingïaumsnam ha ka jylla Manipur ha ka 3 tarik u bnai Jymmang.
Kum ban shu ïathuh hangne, la ong ba haduh kumba 4,000 tylli ki tiar siat bad palat 5 lak tylli ki kuli na ki jaka buh tiar siat bapher bapher jong ki bor pahara ki la shah rong tuh ha ki kynhun runar naduh ka sngi ba la mih ka jingïakajia ha ka jylla Manipur.
Na ka liang ki bor sorkar jong ka jylla ki la pyntip ba tad haduh ka 13 tarik mynta u bnai, ki bor pahara ki la ïoh ban kurup biang ïa haduh 1040 tylli ki tiar siat bad 13,601 tylli ki kuli kiba la shah rong tuh mynshwa.
Nalor ki tiar siat bad ki kuli, ki bor pahara ha ki khyndiat sngi kiba la leit noh ki la ïoh ruh ban kurup biang ïa kumba 230 tylli ki bom na ki thaiñ bapher bapher jong ka jylla Manipur.
Kat kum ki jingïoh lum jingtip la ïathuh ba na ka liang ki bor shipai bad ki bor pulit ha ki khyndiat sngi kiba la leit noh ki la leit ban pynlong ïa ki jingkhynra kiba jur ha kylleng ki bynta jong ka jylla Manipur khnang ban ïoh kurup biang ïa kitei ki tiar siat kiba la shah rong tuh.
Haba phai sha kawei ka khubor, na ka liang u security advisor sha ka sorkar Manipur – Kuldiep Singh u la pynbna ba ïa ka korphiw la pynjynsur da 15 kynta ha ka thaiñ Imphal West, Imphal East, Thoubal bad Bishnupur district, 12 kynta ha ka thaiñ Kakching bad Pherzawl district bad 8-10 kynta ha kiwei kiwei ki distrik jong ka jylla Manipur.
Ha kawei ka liang, la ïoh jingtip ba ïa ka korphiw ym shym la pynjari satia ha kino kino ki distrik Rilum jong ka jylla Manipur.
La ïoh khubor ruh ba na ka liang u Lat jong ka jylla – Anusuiya Uikey un sa leit ban jurip ïa ki ïing dara ha ka thaiñ Churachandpur bad Bishnupur district ban pynlong ïa ka jingïalang bad ki nongshong shnong kiba la hap ban mih noh na ki ïing ki sem ban leit sah ha kitei ki ïing dara. La ïoh jingtip ba na ka liang u Lat un sa leit ruh ban pynlong ïa ka jingïalang bad ki civil society organisations (CSOs) jong kitei ki 2 tylli ki distrik jong ka jylla Manipur.
