Shillong, Jylliew 14:
Ka lympung ïalehkai State Level Under-12 Football Tournament 2023 ka la jan poi sha kaba kut ha kaba phra tylli ki kynhun ki la jam sha ka semi final ha ka liang ki kynthei bad shynrang.
Ha ka liang ki kynthei kiba la lah ban pyntikna ban jam sha ka semi final ki long ka West Khasi Hills, East Khasi Hills, East Jaiñtia Hills bad ka South West Khasi Hills. Katba ha ka liang ki shynrang ki long ka West Jaiñtia Hills, Eastern West Khasi Hills, Ri-Bhoi bad ka East Khasi Hills.
Ha ka jingïakhun jong ki shynrang kaba la long ha ka sngi Balang ha SAI Training Centre, ka East Jaiñtia Hills ka la pynliem noh ïa ka West Khasi Hills da 4-1 kol. U Lazio Dkhar u la khur ïa ka hat-trick hadien ba ïoh thep ha ka minit kaba 13, 26 & 50 bad ïa kawei pat la pynbud da u Forlan Bareh (39). Kham ha shwa u Pynshngaiñ Syiem u la pynkhih jar nyngkong eh na ka bynta ka West Khasi Hills ha ka minit kaba 5.
Ka East Khasi Hills ka la jop da 5-0 kol ïa ka North Garo Hills. U Bankyrshan Kharkongor u la ïoh ban thep ar kol ha ka minit kaba 2 & 43. Katba ïa ki shi kol la thep da u Arkimeai Kharkongor (13), Debormy Kharkongor (32) bad ïa kawei pat la ïarap pynthep da u rangïalehkai ka North Garo u Kasai Gamrik (39).
Ka West Garo Hills ka la shah rem noh ha ka West Jaiñtia Hills da 2-0 kol. Ïa kine kol la thep da u Benedic ha ka minit kaba 7 bad ïa kawei pat la pynbud da u Roland ha ka minit kaba 9.
Ka Ri-Bhoi ka la pynjem khnap biang sa shisien ïa ka South Garo Hills da 7-0 kol. U Imishan Borlang Khongjee u la khur ïa ka hat-trick hadien ba ïoh thep ha ka minit kaba 36, 47 & 48. Katba ïa ar tylli kol la thep da u Fistar Saring (10 & 24), bad shi kol la pynbud da u Mebantei Manih (15) bad u Firstitan (17).
Haba phai sha ki jingïakhun jong ki khynnah kynthei, ka East Khasi Hills ka la pynliem noh ïa ka West Jaiñtia Hills da 3-1 kol. Ka Nabaphylla Majaw ka la ïoh ban thep ar kol ha ka minit kaba 34 & 44 bad ïa kawei pat la thep da ka Amanda Liza Kharakor (43). Katba ka Hunbait Khyriem (18) ka la lah nan pynphai kylla shi kol na ka bynta ka West Jaiñtia.
Ka South West Khasi Hills ka la pynliem noh ïa ka West Garo Hills da 3-0 kol. Ïa kine la thep da ka Ridashisha K. Lyngdoh (11), Deiphiwansara Lyngkhoi (39) bad ka Badapynhun Dkhar (42).
Ka Eastern West Khasi Hills ka la shah rem noh ha ka West Khasi Hills da 3-0 kol. Ïa kine la thep da ka Nazarine D. Sangma (3), Daficare Lyngkhoi (37) bad ka Anisha D. Sangma (5).
Kumjuh ka East Jaiñtia Hills ka la pynliem noh ïa ka South West Garo Hills lyngba ka shi kol ba la thep da ka Yodaka Chyrmang ha ka minit kaba 46.
