Guwahati, Jylliew:
Ki bor sorkar jong ka Assam ha kane ka taiew kaba mynta ki la pyntip ba ki la don haduh 575 ngut ki nongshong shnong na ki 3 tylli ki distrik jong katei jylla kiba la shah ktah na ka jingjia shlei um kaba nyngkong eh ha une u snem ba mynta.
Kat kum ka jingpyllait kyrwoh jong ka Assam State Disaster Management Authority (ASDMA) ka la pyntip ba ki 3 tylli ki distrik jong ka jylla kiba la shah ktah ha ka jingjia shlei um ki kynthup ïa ka thain Udalguri district, Sonitpur district bad ka thaiñ Cachar district.
Na ka liang ki bor sorkar ka ASDMA ki la pyntip ba ka jingjia shlei um ka la jia ha ki 10 tylli ki shnong kiba hapoh u pud u sam jong ki 3 tylli ki ‘revenue circle’. Ki la pyntip shuh shuh ba haduh 150 hectare ki lyngkha rep ha ka thaiñ Gohpur revenue circle bad ha Kalaigaon revenue circle ki la shah ktah na ka jingshlei um.
Ki bor sorkar ka ASDMA ki la pyntip shuh shuh ba ka jingjia shlei um ka la pynjulor ruh ïa 5 tylli ki jingtei ba la shna ban ïada na ka jingshlei um ha ka thaiñ Darrang district, Lakhimpur district bad ha Biswanath Sub-Division. Ki la don ruh haduh 7 tylli ki surok kiba la julor bad kumjuh ruh katto katne tylli ki skul bad ki Anganwadi centre kiba la shah tap lup ha ka um.
Ha kawei ka khubor, na ka liang ki bor sorkar ka ASDMA ki la pyntip ba na ka daw jong ka jingjur jong u slap ha ki khyndiat sngi kiba la leit noh, ka la wanrah ruh ïa ka jingjia shlei um ha ki katto katne tylli ki bynta jong ka nongbah Silchar, Cachar district.
Halor ka jingwan jong ka aïom lyiur kaba ju wanrah ruh ïa ka jingshlei um kaba shyrkhei ha ka jylla Assam, na ka liang u Myntri Rangbah ka jylla ha ki khyndiat sngi kiba la leit u la pynlong ruh da ka jingïalang (video conference) bad ki DC lem bad kiwei kiwei ki heh sorkar ban ïasyllok halor ki mat kiba ïadei bad ki sienjam ban pynkhreh na ka bynta ban ïakhun pyrshah ïa ka jingshlei um ha ka jylla.
Na ka liang u Myntri Rangbah u la bthah ruh ïa u Principal Secretary jong ka tnat Revenue & Disaster Management – Gyanendra Dev Tripathi ba un shim ïa ki sienjam kiba kyrpang na ka bynta ban pynkhreh ïa ki briew jong ka NDRF bad SDRF ha ki jaka kiba kham shong syier, khamtam ha ka thaiñ Dima Hasao.
U Myntri Rangbah u la bthah ruh ïa ki bor sorkar ka ASDMA ba kin pynkhreh na ka bynta ki kam ban pynbiang ïa ki jingmana na ka bynta ki nongshong shnong ka jylla khnang ba kin lait na kino kino ki jingjia kiba lah ban wanrah ïa ki jingsngewsih.
