Lahore, Jylliew:
U Myntri Rangbahduh barim ka Pakistan, u Imran Khan, ha ka Sngi U Blei u la shah pynngat kyndon biang halor ka jingdon kti ha ki kam thied jaka be-aiñ haduh kumba 5,000 kanals (625 acre) ha ki bynta jong ka Punjab Province jong ka Pakistan ha ki por ba la leit.
Da kane, la ong ba ka la poi kumba 140 tylli ki ejahar ba la ujor pyrshah ia utei u nongialam ka Pakistan Tehreek-e-Insaf (PTI) naduh ba u la duh ia ka shuki Myntri Rangbahduh ha u Iaiong jong u snem ba la leit.
Kiba bun na kitei ki ejahar ba la ujor pyrshah ia u, ki dei kiba don jingiadei bad ki kam thombor jong ki lehnoh, nangta pat ka jingwanrah ia ki jingkulmar bad jingia-umsnam, ki jingthmu thombor, ka kam bam sap bad kiwei- kiwei de ki kam thok- kam be-aiñ kiba utei u nongialam u la leh mynba u dang don ha ka bor.
Kumta, la ong ba ka tnat Anti-Corruption Establishment (ACE) jong ka Punjab ka la ujor da ka ejahar ba thymmai pyrshah ia utei u nongialam barim ka Pakistan ha katei ka sngi, ha kaba ia ka para jong u- ka Uzma Khan, u kurim jongka bad u Myntri Rangbah barim ka Punjab Province- u Usman Buzdar ruh ki la shah kynthup lang ha katei ka ejahar ba la ujor ia u Khan ha kane ka kynti.
Katkum katei ka ejahar la ong ba u Khan ha ryngkat bad kiwei de kiba la shah jer kyrteng ha katei ka jing ujor, ki la shu thied be-aiñ kumba 5,261 kanal ka jaka kaba rem dor bha hapoh ka distrik Layyah jong ka Punjab Province ha ka dor kaba tad bha. Ki thied ia katei ka jaka baroh tang ha ka dor kaba PKR 13 klur ha ka pisa Pakistan, na ka dor kaba PKR 6 Billion (600 Klur) kaba dei hok ka dor ban thied bad die ia katei ka jaka.
Kumta, ka tnat ACE ka la suba ba utei u Khan ha ryngkat bad kitei kiba iadon kti lang bad u, ki la shu knieh don bor ia katei ka jaka ‘500 Kanal’ na ki trai jaka kiba la im bad shong- sah ha kitei ki jaka da ki phew snem mynshwa.
