Srinagar, Jylliew:
Ki la don kumba arngut ki briew kiba la shah suba ba ki dei ki lehnoh ki la shah siat ïap ha ka sngi Ba-ar, naba ka kynhun jong ki shipai ïada ri ki la khanglad ïa ka jingthmu rungtuh jong ki bar ri ha Kupwar distrik kaba don ha Jammu & Kashmir, la ïathuh ki pulit.
Ïa kane ka jingthmu rungtuh jong kine ki bar ri la lah ban pynpulom noh da ka kynhun jong ki shipai kiba la ïatreilang jong ka kynhun 57 RR jong ki Army, ki pulit ka Kupwara bad ka kynhun TA 160 Battalion ha Doganar Machil Sector kaba don ha ki bynta jong u Line of Control (LoC) ha Kupwara distrik.
Kane ka jingpyntreikam ka long shi bynta ka jingjop na ka bynta ka jingtrei shitom jong ki shipai ban ïakhun pyrshah ïa ki lehnoh khnang ban lah ban pyntikna ha ka ban pynïoh ka jingshngaiñ ïa ka thaiñ, la ïathuh ki pulit.
Ki la ïathuh ba hadien ba la ïoh ïa ka jingtip kaba bniah kumba la ai da ki kynhun wadbniah, ki shipai ha ryngkat ki pulit jong ka Kupwara ki la pynsted ïa ka jingpyntreikam bad ki la buh da ka jingleit thwet lehnoh ha Machil Sector.
“Kane ka kynhun jong ki shipai ka la pyndonkam ïa ki buit bad pynkhlaiñ ïa ki rukom pyntreikam ban ïakhun pyrshah ïa ki lehnoh, ha kaba kane ka la pynlong ïa ki arngut ki lehnoh ki bym shym la lah ban ithuh ba kin shah siat ïap, ha kaba katkum ka jingïathuh jong ki kaiphot kiba la wan na ka kynhun wad bniah, la ong ba la i kumba kine kiba la shah siat ki dei kiba nabar ri bad don bynta bad ki lehnoh HM ( Hizbul Mujahideen) kiba la pyrshang na ka por sha ka por ban pynrung tuh ïa ki lehnoh shapoh ka ri,” la ong u nongaiktien jong ki pulit.
Kumba ka long haduh mynta ka jingpyntreikam na ka bynta ban ithuh ïa kine kiba la shah siat ïap ka dang bteng.
Ki pulit ki la ïathuh ba ïa ki tiar siat kiba kynthup ruh ïa ki kuli bad ar tylli ki suloi AK 47, saw tylli ki AK Magazines, 48 song ki kuli AK, saw tylli ki bom kawang kti bad kiwei pat ki tiar kiba long beaiñ la ïoh ban kurup na ka jaka ba la don ka jingïasiat bad ki lehnoh.
U ADGP ka Kashmir u Vijay Kumar u la ai kajingïaroh ïa ka kynhun jong ki shipai kiba la don bynta ha kane ka jingleit ïakhun pyrshah khlem da wanrah ïa kino kino ki jingpynjulor ha ka por ba ka la don ka jingïasiat kaba mar kylliang bad ki lehnoh.
“Ka jingpyntreikam kaba la wanrah da ka jingjop ha ka ban ïoh ban pynïap ïa kine ki lehnoh ha Machil Sector ka long kum ka jingai jingsneng ïa kito kiba thmu ban wan rungtuh bad ban pynduh ïa ka shongsuk-shongsaiñ ha ki bynta jong u LoC,” la ong u ADGP.
U la ong ba ki pulit bad ki shipai ïada ri ki la pynjur bha ïa ka jingpyntreikam ha ka ban ai ka jingïada kaba kyrpang na ka bynta ka shongsuk- shongshngaiñ bad ïada ruh ïa ki nongshong shnong jong ka ri.
Ha basdang jong une u bnai, ki la don kumba arngut ki lehnoh kiba la shah siat ïap ha ka por ba ki dang pyrshang ban rungtuh sha ki bynta jong kane ka ri.
Ka thwet lehnoh jong ki shipai ha kane ka thaiñ ka dang ïai bteng khnang ban khanglad ïa ka jingwan rungtuh ki bar ri.
