Aizawl, Jylliew:
Ka kynhun nongmihkhmat jong ka sorkar Mizoram hapoh ka jingïalam jong u Myntri ka tnat Sports – Robert Romawia Royte kan sa leit sha nongbah New Delhi ban kyrpang na ka Sorkar Pdeng ba kan pynbiang ïa ki lad jingïarap na ka bynta palat 10,700 ngut ki paidbah kiba la mih noh na ka jylla Manipur bad wan rieh tngen hapoh u pud u sam jong ka jylla Mizoram.
Kat kum ki jingïoh lum khubor la ïathuh ba na ka liang ka Sorkar Mizoram kan kyrpad na ka Sorkar Pdeng ba kan pynbiang ïa ka song tyngka kaba haduh T.10 klur ban pynbiang ïa ki lad jingïarap na ka bynta ki ki paid Manipur kiba la wan ban rieh tngen ha Mizoram.
Na ka liang u Commissioner & Secretary jong ka tnat Kam Pohïing ka sorkar Mizoram – H Lalengamawia u la pyntip ba un leit ban synran ïa u Royte ha ryngkat kiwei kiwei ki heh sorkar jong ka jylla ban ïakynduh ïa ki heh ki haiñ jong ka Sorkar Pdeng. Kat kum ka jingïathuh jong u Lalengmawia, u la pyntip ba tad haduh kane ka kynti kaba mynta, ka sorkar jylla kam pat shym la ïoh satia ïa kano kano ka jubab na ka Sorkar Pdeng.
Ha ka sien kaba nyngkong, na ka liang ka Sorkar Mizoram ka la kyrpad na ka Sorkar Pdeng ba kan pynbiang shwa ïa ka lad jingïarap kaba T.5 klur na ka bynta ki paid Manipur kiba la wan ban rieh tngen ha Mizoram. Hadien katei, na ka liang u Myntri Rangbah ka jylla – Zoramthanga u la pynlong ïa ka jingkhmih bniah kaba janai bad phah biang da kawei ka shithi ban kyrpad na ka Sorkar Pdeng ba kan pynbiang ïa T.10 klur ka song tyngka ban ai jingïarap ïa ki paid Manipur.
Ïa ka shithi la phah sha u Myntri Rangbahduh jong ka ri – Narendra Modi bad kumjuh ruh sha u Myntri ka Tnat Kam Pohïing jong ka Sorkar Pdeng – Amit Shah ha ka por ba u Zoramthanga u la leit ban jngoh ïa ka nongbah Delhi hapdeng ka 25 bad 30 tarik u bnai Jymmang, 2023.
Na ka liang u Myntri Rangbah u la pyntip shuh shuh ba ka kynhun nongmihkhmat jong ka sorkar jylla kan sa kyrpad ruh na ka Ministry of Home Affairs (MHA) ba kan phah ïa ka kynhun sorkar ba kan leit jurip ïa ki ïing dara ba la pynshong ïa ki paid Manipur kiba la wan ban rieh tngen ha Mizoram bad kumjuh ruh ban lum ïa ki kaiphod kiba tikna na kitei ki paidbah.
Kat kum ka jinglum jingtip na ka tnat Kam Pohïing jong ka Sorkar Mizoram la ïathuh ba tad haduh ka Lah Sngi U Blei mynta ka taiew ki la don haduh 10,808 ngut ki paid Mannipur kiba la wan ban rieh tngen ha ki thaiñ bapher bapher jong ka jylla Mizoram.
La ïoh jingtip ruh ba ka thaiñ Kolasib district ka dei ka thaiñ kaba la pdiang ïa bun ngut eh ki paid Manipur (3,834 ngut) bud sa ka thaiñ Aizawl district (3,765 ngut) bad ka thaiñ Saitual district (2,574 ngut).
Tad haduh kane ka kynti kaba mynta la ïoh jingtip ba ka jylla Mizoram ka dang pynbiang ïa ki jaka sah ïa 34,000 ngut ki paid phetwir kiba na ka ri Myanmar bad palat 700 ngut na ka ri Bangladesh.
