Kolkata, Jylliew:
Ka khubor ba lah ioh lum ka iathuh ba na ka liang jong u rangialehkai shapdeng jong ka kynhun ialehkai phutbol ka ri u Korou Singh u lah shah jied mynta kum u kapten jong ka kynhun ialehkai baroh kawei ha shuwa ban sdang ka lympung AFC U-17 Asian Cup.
Kumta utei u rangialehkai ba dang khynnah ka rta (16 snem) uba don bha ia ka sap ialehkai ka jong u bad kum u nongai mynsiem ia ka kynhun ialehkai baroh kawei, u lah iai pawbha ha ki kam ialehkai ki jong u dang ha ki por ba lah leit noh. Shuh shuh ruh hadien ba u lah dep ban khur kol ha man la ki jingialehkai jong ka SAFF U-17 Championship bad ha ka AFC U-17 Asian Cup Qualifiers, utei u rangialehkai u lah nang iai pyntyllun shakhmat ia ka kam ialehkai ba tbit ka jong u khamtam eh ha ka por ba ka kynhun baroh kawei ka don ha ka jingialehkai ai jinghikai ha Spain bad Germany, pyrshah ia ki kynhun ialehkai Junior jong ki katto katne ki klob ialehkai ba pawnam ha ka pyrthei kum ka kynhun ialehkai na Atletico de Madrid, Real Madrid, VfB Stuttgart, FC Augsburg bad kiwei kiwei shuh shuh. Baroh-lin u la lah ban kamai ia ki lai kol bad san sien ki lad pynbuh bol ha ki 10 tylli ki jingialehkai ai jinghikai ha ka dewbah Europe ha shuwa ba ka kynhun kan poi ha Thailand, ha kaba utei u rangialehkai u la lah ban kamai ia ka shi kol bad sa kawei pat ka lad pynbuh bol ha ki ar tylli ki jingialehkai ai jinghikai pyrshah ia ki kynhun ialehkai katei ka ri.
Kumba ka long mynta, katei ka kynhun ialehkai ka ri ka don mynta ha ka jinghikai bad kilan-met jong ka ha Khao Yai Sports Complex,Thailand ha shuwa ban sdang ka AFC U-17 Asian Cup; ha kaba ka kynhun ka lah shah pynbeit prokram na ka bynta ban ialehkai pyrshah ia ka Vietnam ha ka 17 tarik bud sa ka jingialehkai ha ka 20 tarik bad ka Uzbekistan bad ka jingialehkai ba khatduh ha ka 23 tarik pyrshah ia ka Japan na ka Group D.
