U Haroldson Dympep, Lawmali Pyllun Shillong
Hato, kam long mo ka jingjah burom ia ka longiing longsem, ia ka ri bad ba ka jaidbynriew, ba u longkñi u knieh noh shalade ia ka burom bad ia ka iktiar ka jong u longkpa, tang namar ka jingkyntiew kurim kaba donburom ka jong ki khun kti ki jong u?
Ngam don jingartatien ban ong, ba kane ka jinglong bad jingleh jingkam jong ngi ki khasi ka la wallam barabor ia ka jingsngewsih bad ka jingbynniaw ha ka jingim jong ngi hi.
Ha kum kane ka jinglong jingman, don mo na ngi, kiba la ju pynleit jingmut, ba kane ka jingleh jingkam jong ngi ka la wallam ka jingmyntoi kaba long ka jingkyrkhu ia ngi u paid khasi ne ka long kaei kaei ka bym itynnad dur ia ka ban peit bad iohsngew ruh kumjuh ?
Ym lah ia ka ban len, ba la don bun bah na ngi, kiba kynmaw kyndiang bad mad ruh ia kane ka jinglong bad jingjia ha ka jinjgim kaba shimet jong ngi hi.
Hynrei, namar ka jingbym pynleit jingmut bha bad shim khia ia, ka shu iai long bad shuh iai bteng haduh mynta mynne, bad ngam don jingartatien ruh ban ong, ba lada ngim pyntreikam bad pynbeit noh ia ka, kan iai long bad iai bteng lynter taid lyngba ki sngi bad ki por ba dang wan ruh kumjuh.
Ngam don jingartatien ban ong, ba kane ka jingleh jingkam jongngi, ka la wallam, ym tang ia ki jingsngewsih bad jingbynniaw, hynrei, ka jingjah burom ia ka iing ka sem, ia ka ri bad ia ka jaidbynriew hi baroh kawei.
Te, katkum kine ki jingpynsngew jongnga, nga sngew ba ka la dei ia ngi, ban pynsangeh noh mardor ban pyntrei kam ia ka, khnang ba ngin lah ban ioh ia ka jingsuk bad jingtngen mynsiem ha ka jingim jongngi.
Halor ia kiei kiba nga la ioh ban pynsngew, ioh don napdeng jongngi hi ki paid khasi, ki ban ong pat, balei ngin pynsangeh noh ia kaei kaba u longshuwa u manshuwa u la ong bad leh, ka long kaei kaei bym lah ban long haei haei ruh em.
Ho-oid, kam long kaba dei ia ngi ban iaid lait na kaei kaba u longshuwa u manshuwa u la ong bad leh.
Lada ka dei ia ngi ban iai pyntreikam iaka, ka la dei ban don ki nongrim kiba skhem bad kiba dei biang ha kaba ngin ym don jingartatien ban pyntrei kam ia ka.
Hynrei, kaba sngewsih ban ong, haba kylli ia kito ki briew kiba ong, ba ngi dei ban pyntreikam beit ia ka kumba la seng nongrim u longshuwa u manshuwa, ka jubab pat ka long beit, ym tip.
Haba baroh baroh ngi ia ong ym tip, kam shym la dei ia ngi ban pynsangeh noh ha ka ban pyntrei kam ia ka ?
Nalor ia kiei kiba la pynsngew haneng, kane ka jinglong bad jingleh jingkam ka jongngi, ka wallam ia kine ki jinglong kiba ktah ia ka jingim jongngi hi, bad kita ki long kumne :-
Ngi wallam ka jingpynrem kaba dalade ialade hi, kaba long hakhmat ka pyrthei bad khamtam eh ia ka burom ka jong U Blei.
Naduh ka sngi ka jingiaieid samla ka jong ki khun ki kti jong ngi, kila ia pynithuh iwei ia iwei pat ha la ki jong ki kmie ki kpa, jong baroh arliang ki longiing longsem.
Bad dei ruh haba ki kmie ki kpa jong ki, ki la sngewthuh shai ba kano kano ka sang ka ma bad ino ino I jingpynwit iba rit eh iba lah ban khanglad khanglynti ha ka jingkyntiew kurim ka jong ki khun ki kti kam don, ba ki sa shah sngewbha ia ki ban ia leit ia wan laitluid, ha ryngkat ka sneng ka kraw bad duwai ruh ia ka jingdon ryngkat ka jong u Blei ba ki khun jong ki kin ym hap bad kyllon noh, ha ka ba ka jingkyntiew kurim jong ki kan long kaba jop, kaba pynsngewbha eh ia u Blei.
Hynrei, kaba sngewsih ban ong, ba ynda haba la poi ka sngi ka ia ban ia pynbeit noh ia ka jingkyntiew kurim ka jong ki khun ki kti, ki kmie ki kpa lem bad kiba haiing hasem ki paralok para marjan marpar jong baroh arliang kur, ki ia pynlong ia ka jingiawad dong wad daw pat, ioh dang don shuh shuh kano kano ka daw kaba khanglad ia ka jingiapoikha poi man ki khun jong ki, da kaba leh klet ia kaei kaba ki la pynsngew ha la ki jong ki khun ki kti bad kiba haiing hasem naduh kaba sdang ka jingiaieit iathoin ka jong ki khun ki kti jong ki.
Kane ka long bad jingjia, ka long wat ha ka jingiapoi kha poi man ka jong ki khun ki kti kaba la long ruh katkum ka jingpynbeit ka jong ki kmie jong ki hi.
Ka pynlong bad pynlah ia ngi ban leh pop bad kren ia ka lamler :- Kane ka ktah khamtam ia kito ki longiing longsem ki bym don la u longkni. Khnang ban pyni pyrthei ba ki don la u longkni, ki pynlong kni da u riewshisngi, u bym dei uba mih na ka juh ka kpoh, hynrei tang namar ba u dei uba iateh kur lane ba u dei na kajuh ka jaid ka kynja.
Ka pynkyrtoh ia ka jinglong jingim jongngi hi :- Don bun bah ki riewrangbah kiba da sngewkhyllew bad sngew sarong ba ki dei ki briew kiba bitnam bad kiba dei biang ban mihkhmat kum ki longkni ha ka jingia poi kha poi man ka jong ki pyrsa jong kim, da kaba leh klet pat ba ia ka iktiar bad ia ka burom kaba ki don hok halor ki khun la jong, la sliah bad la dep sliah da u kni jong ki khun ki kti ki jong ki ha ka jingiapoi kha poi man ka jong ki khun jong ki hi.
Te, katkum kine ki jingpynsngew bad pynshai baroh, nga sngew ba kam dei shuh ia ngi, ki longkñi ban knieh noh ia ka burom bad ka iktiar ka jong u long-kpa, dei u longkpa hi uba dei hok ban mihkhmat ia la ki jong ki khun ki kti, namar dei tang ma u, uba don ka jingkitkhlieh kaba dei biang na ka bynta la ki jong ki khun. Kaba khatduh kaba nga kwah ban pynsngew ka long, ba lada baroh baroh ngi ri khuid ia la ka jingim, kaba long katkum ki kyntien kiba ngi la khlei, ba kaba ho-oid kan long ho-oid bad kaba em kan long em, naduh kaba sdang, ha ka jingiakren bad ka jingiapyni ia pynshai jongngi bad la ki khun ki kti, nga ngeit ba ki jingialang jongngi ki arliang kur, ka jingiawad dong wad daw kan ym don, hynrei kan shu long beit beit, tang ka jingiapynithuh iwei ia iwei bad ban ia pynbuh beit ia ka sngi kyntiew kurim ka jong ki khun ki kti jong ngi hi.
