Shillong, Jylliew 14:
U coach jong ka kynhun ïalehkai athletics jong ka ri u Radhakrishnan Nair u la pynthikna ba ka khlur nongmareh ka Hima Das kan ym ïashim bynta ha ka Asian Games ka ban long ha China na ka daw ka jingmynsaw naduh u Iaiong mynta u snem.
Kane ka ‘thei ïalehkai kaba dang 24 snem ka rta ka la khur ïa ka takma rupa ha ka jingïakop mareh kaba 400m ha ka Jakarta Asian Games ha u 2018. Ka la ïadon bynta ruh na ka bynta ban khur ïa ka takma ksiar ha ka bad rupa ha ka women’s 4x400m bad mixed 4x400m relay (teams) ha Jakarta.
“Ka long kaba sniewbok ba ka Hima ka la mynsaw shi sngi shwa ban sdang ka Indian Grand Prix IV kaba la long ha Bengaluru ha ka 15 tarik u Ïaïong. Hadien ba la dep ban bishar bniah na katei ka jingmynsaw, ka Hima kan hap ban shah sumar khnang ba kan ïoh ïa ka jingkoit ha ka por kaba biang. Nga la thikna ba kan ym ïashim bynta ha ka Asian Games kaba long ka kum ki kyndon jong ka AFI,” la ong u Nair.
Ka jingmynsaw ka Hima ka la pynlong ban duh ïashim bynta ha ka Federation Cup kaba la long ha Ranchi ha u bnai ba la lah. Ka la don jingkyrmen ba kan ïoh biang ïa ka jingkoit jingkhiah khnang ban ïoh ïashim bynta ha ka
National Inter-State Championship, kaba long ka prokram ban jied khatduh na ka bynta ka Hangzhou Asian Games.
Hynrei katei ka jingmynsaw ka pat shym la koit pura bad kan duh ïashim bynta ha katei ka lympung.
Na ka liang ka Athletics Federation of India (AFI) ka la pynpaw shai ba baroh ki nongïalehkai kiba la ïoh jingmynjur, ki dei ban ïashim bynta ha ka
National Inter-State Championship khnang ba kin ïoh ban ïashim bynta ha ka Asian Games. Ïa kane ka lympung la thmu ban sdang naduh ka sngi Palei ha Bhubaneswar.
